Facebook Marketplace орқали 2006 йилда ишлаб чиқарилган уч ғилдиракли ZAP Xebra автомобили сотилди. Бу Америка ҳукуматининг талаби билан утилизация қилинган ушбу моделдаги электрокарлар орасида омон қолган ягона нусха ҳисобланади. Электрокар 850 долларга сотилган бўлиб, бу пулга замонавий смартфон беради. Машинанинг бу каби арзонлиги унинг ҳаракатланишга яроқсиз ҳолга келиб қолгани, салони чиқиндиларга тўла экани, марказий тоннели олиб ташлангани билан изоҳланмоқда, деб хабар беради Motor.
Уч ғилдиракли сити-кар — Хитойнинг Шандонг ва Калифорниянинг ZAP (Zero Air Pollution) маркалари томонидан 2006—2009 йиллар оралиғида ишлаб чиқарилган. Электрокар 6,7 литрли электромотор ёрдамида ҳаракатга келиб, бир марта қувватланиш орқали у 65 километрга яқин йўл босишга қодир. АҚШда Xebra илк бор пайдо бўлган вақтида 10,5 минг долларга сотилганди.
2013 йилда Xebra’нинг тормоз тизимида жиддий муаммолар борлиги аниқланган ва машиналарни чақириб олиш орқали компания буни ҳал эта олмаган. Америка ҳукумати автомобиль ишлаб чиқарувчидан 700 га яқин электрокарни сотув олишни талаб қилган. ZAP машина эгаларига 3100 доллар миқдорида компенсация ваъда қилган ва тўпланган Xebra’ларни утилизацияга юборган. Аммо афтидан, битта машина барибир омон қолган кўринади.
ZAP Xebra — дунёдаги энг арзон электрокар эмас. Ушбу ном Хитойнинг Changli моделига тегишли бўлиб, унинг нархи 930 долларни ташкил этади ва у картон қутида етказиб берилади.
Изоҳ (0)