Surxondaryo viloyati Qiziriq tumanida voyaga yetmaganlar “KamAZ” yuk mashinasini boshqargani aniqlandi. Bu haqda viloyat IIB YHXB xabar berdi.

Kadr: Videodan skrinshot

Ma’lum qilinishicha, davlat raqami belgisiz “KamAZ” rusumli yuk mashinasi davlat ahamiyatiga ega bo‘lgan 4R-103 avtomobil yo‘lining Qiziriq tumanidan o‘tgan 17-kilometrida to‘xtatilganida uni maktab o‘quvchisi boshqarib ketayotgani aniqlangan.

“Haydovchi” o‘zini 13 yosh ekanligi, “KamAZ”ni haydashni bilishi, o‘zi Sheroboddagi 72-maktab o‘quvchisi ekanligi, bu yil 7-sinfga o‘tishi, hozirda ta’tilda ekanligini aytgan.

Salonda uning 16 yoshli sherigi ham borligi, ular birgalikda “KamAZ”da Qiziriq tumaniga g‘isht tashib ketishayotgani ma’lum bo‘ldi. Bolalar ularga yuk mashinasini haydovchining o‘zi berganini aytdi.

Qoidabuzarlarga tegishli tushuntirishlar berildi va ota-onasi ishtirokida profilaktik suhbat o‘tkazilishi bildirildi.

“KamAZ” vaqtincha jarima maydonchasiga qo‘yildi. Haydovchiga tegishli choralar ko‘riladi.

Bundan avval Surxondaryoda haydovchilik guvohnomasi bo‘lmagan yigit boshqaruvidagi Nexia pastlikka tushib ketgani, Surxondaryoda haydovchilik guvohnomasi bo‘lmagan yigit boshqaruvidagi “Jiguli” 11 yoshli piyodani urib yuborgani hamda Jizzaxda voyaga yetmagan bola YTH sodir etgani haqida xabar berilgandi.