Ford Motor Company томонидан 1938 йилда қуйилган помидор шарбати шишаси Sotheby’s аукцион орқали сотувга қўйилади. Henry’s Attic: Some Fascinating Gifts to Henry Ford and His Museum китобига кўра, Генри Форд Дирборндаги плантациясида уч ҳафтагина кичик консерва заводини очган ва шаҳар хайрия ташкилотларига шарбатларни бепул етказиб берган, деб хабар беради Motor.
«Буюк депрессия» даври бошланишидан олдин Генри Форднинг Мичиган жануби-шарқида юзлаб гектар ери бўлган ва у ерда соя, сабзи, помидор ва бошқа полиз экинлари етиштирилган. Америка учун оғир кечган ўнлаб йиллар давомида саноатчи ҳосилнинг бир қисмини хайрия ташкилотларига бепул тарқатган. 1938 йилда Дирборндаги эски мактаб биносида (ҳозирда концерн штаб-квартираси жойлашган) Форд помидор шарбатини ишлаб чиқаришга мўлжалланган консерва заводини очган.
Уч ҳафта давомида 30 нафар бола ва беш нафар эркак шарбатни идишларга қуйган. Жами ишлаб чиқарилган 52 505 шишадан ҳозиргача жуда оз қисми сақланиб қолган, аммо вақти-вақти билан улар аукционларда пайдо бўлиб туради — асосан бўш. Sotheby’s орқали ҳали очилмаган шиша сотувга қўйилмоқда, аммо унинг ичидаги шарбат истеъмолга яроқсиз ҳисобланади. Шиша устидаги ёрлиққа кўра, Ford Motor Company шарбати А, B ва C витаминларига бой, Ford’нинг Дирборндаги фермасида етиштирилган сара помидорлардан қилинган.
Тарихнинг бир қисмига айланган ушбу шиша 150—300 долларга баҳоланмоқда. Таъкидлаш керакки, 1938 йилда компаниянинг помидорлар билан боғлиқлиги якунланмаган. Орадан 76 йил ўтгач, Ford H.J.Heinz Company билан бирлашиб, помидор пўстлоғи, пояси ва уруғларини ўрганадиган биокомпозит лойиҳани яратиш бўйича тадқиқотни ишга туширилган.
Аввалроқ шаҳзода Чарльз ва малика Диананинг тўй маросимидаги торт бўлаги Англиядаги Глостершир аукциони орқали сотилиши тўғрисида хабар берилганди.
Мавзуга доир: Малика Дианага тегишли бўлган Форд аукционга қўйилади
Изоҳ (0)