Қирғизистон президенти Садир Жапаров 28 ноябрь куни Республика парламенти депутатлари сайловини ўтказиш тўғрисида фармон имзолади. Бу ҳақда давлат раҳбари матбуот хизмати хабар бермоқда.
11 апрель кунги референдумда қабул қилинган Қирғизистон Конституциясига мувофиқ, парламент 90 нафар депутатдан иборат бўлиб, улар 5 йил муддатга сайланади. Аввалги сайловлар натижалари оммавий норозиликлар фонида бекор қилинган эди.
«Президент фармонига мувофиқ жорий йилнинг 28 ноябрь куни Жогорку Кенеш депутатлари сайловини ўтказиш куни деб белгиланди», — дейилади хабарда.
2021 йил 27 август куни «Қирғизистон Республикасининг ‘Қирғизистон Республикаси президенти ва Қирғизистон Республикаси Жогорку Кенеш депутатлари сайловлари тўғрисида’ги конституциявий қонунига ўзгартиришлар киритиш тўғрисида»ги конституциявий қонун кучга кирди, у парламентни қисқартириш ва депутатларни сайлашнинг янги тартибини кўзда тутади. Янги ўзгаришларга кўра, парламент депутатлари сайловини аралаш сайлов тизими бўйича ўтказиш кўзда тутилади. 54 депутат ягона сайлов округи бўйича пропорционал тизим орқали (сиёсий партиялар номзодларининг очиқ рўйхатлари) сайланади, яна 36 депутат бир мандатли сайлов округларида мажоритар тизим бўйича сайланади.
Изоҳ (0)