Бангладеш шарқида 27 август куни ичида юз нафар йўловчи бўлган қайиқ ва қум ортилган траулер (балиқ овлашга мўлжалланган кема) тўқнашиб кетди. Ҳодиса оқибатида камида 21 киши ҳалок бўлди. Бу ҳақда полицияга таяниб, маҳаллий Dhaka Tribune газетаси хабар берди.
Қайд этилишича, фожиа Браҳманбария округидаги кўлда содир бўлган. Тўқнашувдан кейин қайиқ ағдарилиб кетиб, одамлар сувга қулаган. Кўп ўтмай қайиқ бутунлай сувга чўккан.
Полиция маълумотларига кўра, 15 киши қутқарувчилар ёрдамида сувдан чиқарилган, улар касалхонага ётқизилган. Яна 50 йўловчи мустақил равишда қирғоққа сузиб чиқишга муваффақ бўлган. Қолганлар бедарак йўқолганлар рўйхатига киритилган.
Қидирув-қутқарув ишлари давом этмоқда.
Бангладешда май ойида ҳам тезюрар қайиқ қум ортилган юк кемаси билан тўқнашиб кетиб, 26 киши ҳалок бўлганди. Апрель ойида эса бортида 50 киши бўлган қайиқнинг бошқа паромга тўқнашиб кетиши натижасида йўловчиларнинг беш нафари ҳалок бўлган.
Шунингдек, Туркияда июль ойида сайёҳлар ўтирган қайиқ чўкиб кетиб, 2 ёшли бола ҳалок бўлганди.
Март ойида Ўрта Ер денгизининг Тунис қирғоқлари яқинида ичида ноқонуний кўчаётган муҳожирлар бўлган иккита қайиқ ағдарилиб, чўкиб кетган. Ҳалокат оқибатида камида 39 киши ҳалок бўлган. Улар орасида аёллар ва болалар ҳам бор.
Изоҳ (0)