Ижтимоий тармоқларда Хоразм вилоятида вакцина олгандан сўнг аҳволи оғирлашган фуқаро ҳақида видеолавҳа тарқалгач, Соғлиқни сақлаш вазирлиги ушбу вазиятни назоратга олгани, унинг аҳволини ўрганиш, бу ҳолат нима сабабдан юз берганига аниқлик киритиш мақсадида тезкор мутахассислар гуруҳи тузилгани ҳақида хабар берилган эди. ССВ матбуот хизмати ўрганиш натижалари бўйича маълумот берди.
Дастлабки маълумотларга қараганда, видеолавҳада тилга олинган фуқаро С.Ё. 30 ёшда бўлиб, илгари менингит белгилари билан муолажа олган, гепатит С ва иккала кўз миопия енгил даражаси ташхиси билан диспансер назоратида турган.
Фуқаро С.Ё. 27 август куни шифокор кўригидан ўтказилиб, вакцина олишга қарши кўрсатма бўлмаганлиги сабабли коронавирусга қарши эмланган ва оилавий шифокор кузатувида бўлган. Вакцина олгандан кейин ҳеч қандай ножўя таъсирлар кузатилмагач, акаси С.О.нинг уйига кетган.
Шу куни тунги соат 21:17 ларда С.Ё.да умумий ҳолсизлик, қўл-оёқ тортишиши, нафас қисиши каби белгилар кузатилган ва шундан сўнг фуқаронинг яқинлари тез тиббий ёрдамга мурожаат қилган. Тиббий бригада томонидан С.Ё.га Вегетотомир дистонияси дастлабки ташхиси қўйилиб, унга биринчи тиббий ёрдам кўрсатилган.
Сўнг С.Ё. текширув ва даволаш учун Республика шошилинч тиббий ёрдам илмий марказининг Хоразм филиалига олиб борилган. У даволаш муассасаси қабул бўлимида невропатолог шифокор томонидан тиббий кўрикдан ўтказилиб, белгиланган стандартлар асосида зарур тиббий ёрдам кўрсатилган ва кузатувда бўлиши тушунтирилган. Бироқ фуқаро шифохонада ётишдан бош тортган.
Вазирлик хабарида қайд этилшича, видеомурожаатда кўзи кўрмай қолганлиги қайд этилган С.Ё. мазкур даволаш муассасаси қабулхонасига тез ёрдам машинасидан мустақил тушиб, шифокор қабулига ўзи юриб кирганлиги ва юриб чиқиб кетганлиги видеолавҳада айтилган сўзлар ҳақиқатга мос келмаслигини кўрсатади.
Бундан ташқари, 29 август куни Республика ихтисослаштирилган нейрохирургия илмий-амалий тиббиёт маркази директори, тиббиёт фанлари доктори Ғайрат Қориев бошчилигидаги нейрохирург, инфекционист, невропатолог, офталмолог ва иммунолог каби қатор мутахассислар С.Ё.ни яна бир бор тиббий кўрикдан ўтказган. Кўрик давомида С.Ё.нинг аҳволи қониқарли, нафас олиши ва юрак уриши меъёридалиги маълум бўлган. Қолаверса, унинг кўз тубида патологик ўзгаришлар аниқланмаган. Айни пайтда С.Ё. ўзини яхши ҳис қилмоқда.
Тиббий кўрикдан ўтказган бош мутахассисларнинг якуний хулосаларига кўра, фуқаро С.Ё.нинг бир кун аввалги соғлиғидаги ўзгаришлар эмлаш билан боғлиқ эмаслиги ойдинлашган.
«Шу ўринда таъкидлаш лозимки, бугунги кунда мамлакатимизга олиб келинаётган ва бутун дунёда қўлланилаётган коронавирусга қарши вакциналар бўйича маълум қарши кўрсатмалар бўлиб, энг асосий монеликлардан бири бу анафилактик шок ҳисобланади. Ушбу ҳолат аввал бошқа дорилар ёки вакцинага нисбатан қандайдир реакциялар ва анафилактик шок юз берган беморлардагина кузатилиши мумкин. Бошқа ҳеч бир инсонда бундай нохуш ҳолат рўй бермайди.
Бунинг исботи сифатида айни пайтгача дунёда 5 миллиардга яқин одам, мамлакатда эса 14 миллионга яқин вакцина дозаси қўлланилган бўлса, тиббий кузатувлар натижасида бирорта инсонда анафилактик шок кузатилмаган. Эмлашдан кейинги юз берувчи ҳолатларнинг барчаси енгил ва ўрта даражадаги ўзгаришлар бўлган. Булар — ҳолсизлик, мушаклар ва суякларда оғриқлар, иситманинг бироз кўтарилиши ҳамда инъекция қилинган жойда оғриқ пайдо бўлишидир. Ушбу ўзгаришлар ҳам қисқа вақтда ўтиб кетадиган ҳолатлар ҳисобланади.
Қолаверса, юқорида таъкидланганидек, вакцина қилишга энг асосий монеликлардан бири ҳисобланган анафилактик шок ҳолати вакцина қилингандан кейин 30 дақиқа ичида рўй бериши мумкин. Хоразмлик С.Ё. эса эмлашдан аввал ҳамда вакцина олгандан сўнг тиббий кўрикдан ўтказилган ва ҳеч қандай салбий таъсирлар кузатилмагандан сўнггина уйига рухсат берилган», — дейилади ССВ баёнотида.
Таъкидланишича, агар С.Ё.нинг соғлиғидаги салбий ўзгаришлар чиндан ҳам вакцина билан боғлиқ бўлганида, унда 30 дақиқа ичида анафилактик шок ёки бир нуқтага қараб, қотиб қолиш ҳолати кузатилган бўларди. Бироқ ижтимоий тармоқларда тарқалган видеолавҳада кўриш мумкинки, С.Ё.нинг эс-хуши жойида, ён-атрофидаги гап-сўзларни эшитиб, тушуниб турибди, ҳеч қандай судурги ҳолатлари йўқ.
«Яна шуни айтиш лозимки, вакциналарнинг ўзи ҳеч қачон ва ҳеч қандай касалликни чақирмайди. Шунингдек, вакцинациядан кейинги салбий ҳолатлар ҳеч қачон бир марта ёки бир одамдагина кузатилмайди, аксинча бир нечта одамда ва жамоавий рўйхатга олинади. Шу маънода олиб айтсак, фуқаро С.Ё.нинг соғлиғидаги ўзгаришлар эмлаш билан боғлиқ эмас.
Шундай экан юртдошларимиздан коронавирусга қарши эмлаш тадбирларига тўғри муносабатда бўлишларини, вакцина ҳақида фикр билдиришдан аввал масалага мулоҳаза билан ёндошишларини, ижтимоий тармоқлар имкониятларидан кимнидир обрўсизлантириш, аҳоли ўртасида эмлаш бўйича нотўғри тасаввур уйғотиш мақсадида фойдаланмасликларини сўраб қоламиз. Зеро, бугун давлатимиз халқнинг саломатлиги йўлида барча куч ва имкониятни ишга солаётган бир пайтда бундай ҳолатларга йўл қўймаслик, аксинча, ўзимиз ва яқинларимиз саломатлиги йўлида эмланиш барчамиз учун энг тўғри йўлдир», — дейилади ССВ хабарида.
Шунингдек, 1 апрелдан бошлаб йўлга қўйилган оммавий эмлаш тадбирлари давомида Ўзбекистонда қўлланилаётган вакциналар билан эмланган аҳоли вакилларида бирорта ҳам жиддий салбий таъсир кузатилмагани қўшимча қилинган.
ССВ маълумотларига кўра, 28 августга келиб Ўзбекистонда жами 14 027 520 доза вакцинадан фойдаланилган бўлиб, шу кунгача 1 729 454 нафар фуқаро тўлиқ эмланган.
Изоҳ (0)