Қашқадарё вилоятининг Чироқчи туманида прокурор қабулига борган одамлар «Ўзбекистонда қонун йўқ, ҳеч қачон бўлмайди», дея норозилик билдириб, ғалаён кўтаргани акс этган видео 28 август куни ижтимоий тармоқларда тарқалди. Бош прокуратура матбуот хизмати видеоёзувдаги ҳолат юзасидан расмий маълумот берди.
Аниқланишича, 25 август куни Чироқчи тумани «Тарағай» маҳалласида яшовчи фуқаро А.Б. маст ҳолатда ўғли билан жанжаллашиб, ўғлига оғир тан жароҳати етказиб, ўлимига сабабчи бўлгани юзасидан Жиноят кодексининг 104-моддаси 3-қисми «д» банди билан жиноят иши қўзғатилиб, тергов ҳаракатлари туман Ички ишлар бошқармаси терговчилари иш юритувига олинган.
Жиноятнинг келиб чиқишига имкон берган шарт-шароитларни аниқлаш ва келгусида шу каби жиноятлар содир этилишининг олдини олиш мақсадида 27 август куни соат 18:00 ларда туманнинг 4-сектор ҳудудида жойлашган «Тарағай» маҳалласидаги 27-сонли мактаб биносида «Тарағай» ва унга қўшни бўлган «Лангар» маҳаллалари фаоллари иштирокида туман ва вилоят Ички ишлар бошқармаси масъуллари томонидан муҳокама йиғилиши белгиланган.
Мазкур йиғилиш ички ишлар органлари томонидан ташкил этилиб, йиғилишда прокуратура вакилларининг иштироки назарда тутилмаган.
Маълумот учун, 25 июнь куни «Лангар» МФЙ Тўлақул қишлоғида фуқаро Ж.А. қўшниси — ҳомиладор Н.Ж.га нисбатан куч ишлатиб, уни жинсий алоқа қилишга ундайди. Бироқ юзага келган ҳолатда ўз номусини ҳимоя қилган аёл ёнида бўлган ошхона пичоғи билан Ж.А.га бир маротаба зарба уриб, уни ўлдиради.
Ушбу ҳолат юзасидан жиноят иши қўзғатилиб, Чироқчи туман прокуратураси томонидан тергов ҳаракатлари олиб борилмоқда.
Тергов ҳаракатлари давомида марҳум Ж.А.нинг ўлими ҳолати юзасидан Чироқчи туман прокурори томонидан Лангар қишлоғида аҳоли ва жабрланувчилар билан икки маротаба учрашув ўтказилган, марҳумнинг яқинлари туман прокуратурасида уч маротаба қабул қилиниб, уларнинг жиноятга Н.Ж.нинг акаси ва отасининг ҳам алоқаси борлиги ҳақидаги таҳминлари дастлабки терговда текширилиб, ўз тасдиғини топмаган.
Марҳум Ж.А.нинг ўлими ҳолати юзасидан тергов ҳаракатлари устидан вилоят прокуратураси томонидан назорат ўрнатилган.
Шунга қарамасдан, 27 август куни Ички ишлар бошқармаси масъуллари томонидан «Тарағай» маҳалласида умуман бошқа жиноят иши муҳокамасига бағишланган йиғилишга марҳум Ж.А.нинг қариндошлари ўзбошимчалик билан келиб, жамоат тартибини бузиб, ҳуқуқни муҳофаза қилувчи орган ходимларига нисбатан туҳмат ва ҳақоратамуз ибораларни ишлатиб, прокурор қабул қилишини талаб қилиб, «вилоят прокуратураси мажлисга келаман деб келмади», деган асоссиз важлар билан, видеолавҳаларни интернет тармоқларида тарқатиб юборган.
Хабарда таъкидланишича, видеолавҳа орқали ҳуқуқни муҳофаза этувчи органларни обрўсизлантиришга қаратилган ҳаракатларга қонуний баҳо берилиши таъминланади.
Қашқадарё вилояти ИИБ хабарида қайд этилишича, марҳум А.Ж.нинг ўлими юзасидан Ж.Н.га нисбатан Жиноят кодексининг 97-моддаси (қасддан одам ўлдириш) бўйича жиноят иши қўзғатилиб, ҳозирда Чироқчи туман прокуратураси томонидан тергов ҳаракатлари олиб борилмоқда. Жиноят ишининг тергови вилоят прокурори томонидан назоратга олинган.
Изоҳ (0)