Kobuldan Vengriya Qurolli Kuchlari harbiy samolyotlari orqali Buxoro xalqaro aeroportiga 200 nafar yaqin afg‘onistonlik olib kelindi. Bu haqda Buxoro xalqaro aeroporti mas’ullari bergan ma’lumotga tayanib “Daryo” muxbiri xabar berdi.

Foto: Buxoro xalqaro aeroporti

Ma’lum qilinishicha, 2021-yilning 20—22-avgust kunlari Kobul aeroportidan Vengriya havo kuchlari orqali Buxoro xalqaro aeroportiga 200 nafarga yaqin afg‘on fuqarosi — 56 nafar erkak, 53 nafar ayol, 64 nafar bola evakuatsiya qilingan. Va aeroport hududida vaqtinchalik chodirlar o‘rnatilib, zarur oziq-ovqat mahsulotlari hamda dorilar bilan ta’minlangan. Shuningdek, koronavirusga qarshi testlar olingan.

Foto: Buxoro xalqaro aeroporti

Aniqlik kiritilishicha, evakuatsiya qilinganlar orasida 2 nafar vengriyalik, 2 nafar avstriyalik, 35 nafar amerikalik hamda 134 nafar eronlik bo‘lgan.

Kobuldan Buxoroga evakuatsiya qilinganlarning aksariyat qismi 23-avgust, dushanba kuni Vengriyaning Budapesht shahriga olib ketilgan.

Foto: Buxoro xalqaro aeroporti

“Afg‘on bolalari uzoq yillarki, tongni bombalar portlashiyu, qurollar otishmasi bilan qarshilaydi. Bolaligimizdan O‘zbekiston davlati fuqarolari tongni bayram shodiyonalari bilan qarshilab, kunni bayram mushaklari otilishi bilan yakunlashadi, deya eshitganmiz. Bu xuddi bizga ertaklardagidek tuyulardi. Bugun esa shu ertaknamo zamindamiz. O‘zbekiston bizni xuddi o‘z farzandidek qarshiladi, do‘st bildi, birodar ko‘rdi. Cheksiz minnatdormiz”, — deydi afg‘onistonlik Abu Nasr Akbar.