Bangladesh sharqida 27-avgust kuni ichida yuz nafar yo‘lovchi bo‘lgan qayiq va qum ortilgan trauler (baliq ovlashga mo‘ljallangan kema) to‘qnashib ketdi. Hodisa oqibatida kamida 21 kishi halok bo‘ldi. Bu haqda politsiyaga tayanib, mahalliy Dhaka Tribune gazetasi xabar berdi.
Qayd etilishicha, fojia Brahmanbariya okrugidagi ko‘lda sodir bo‘lgan. To‘qnashuvdan keyin qayiq ag‘darilib ketib, odamlar suvga qulagan. Ko‘p o‘tmay qayiq butunlay suvga cho‘kkan.
Politsiya ma’lumotlariga ko‘ra, 15 kishi qutqaruvchilar yordamida suvdan chiqarilgan, ular kasalxonaga yotqizilgan. Yana 50 yo‘lovchi mustaqil ravishda qirg‘oqqa suzib chiqishga muvaffaq bo‘lgan. Qolganlar bedarak yo‘qolganlar ro‘yxatiga kiritilgan.
Qidiruv-qutqaruv ishlari davom etmoqda.
Bangladeshda may oyida ham tezyurar qayiq qum ortilgan yuk kemasi bilan to‘qnashib ketib, 26 kishi halok bo‘lgandi. Aprel oyida esa bortida 50 kishi bo‘lgan qayiqning boshqa paromga to‘qnashib ketishi natijasida yo‘lovchilarning besh nafari halok bo‘lgan.
Shuningdek, Turkiyada iyul oyida sayyohlar o‘tirgan qayiq cho‘kib ketib, 2 yoshli bola halok bo‘lgandi.
Mart oyida O‘rta Yer dengizining Tunis qirg‘oqlari yaqinida ichida noqonuniy ko‘chayotgan muhojirlar bo‘lgan ikkita qayiq ag‘darilib, cho‘kib ketgan. Halokat oqibatida kamida 39 kishi halok bo‘lgan. Ular orasida ayollar va bolalar ham bor.
Izoh (0)