Туркманистоннинг Лепаб вилояти, Туркманобод шаҳрида коронавирусга топширилган тестларнинг ижобий чиқиш ҳолатлари ўн баравар кўпайди. Аввалига Ашхободда, энди бошқа ҳудудларда савдо марказлари ёпилмоқда, дея хабар берди turkmen.news мустақил нашри.
Хабарга кўра, Туркманобод шаҳридаги ҳудудий санитария-эпидемиология станциясида COVID-19 га тест олиш ишлари уч сменада кеча-ю кундуз давом этмоқда. Лебап вилоятини тарк этмоқчи бўлганлар ҳар бири 70 кишидан иборат 17 та гуруҳга бўлинади, яъни кунига 1190 киши текширилади. Бир ой олдин ҳар куни 3-4 та ижобий натижа аниқланар эди, ҳозир эса 30 та атрофида. Маълумот олиш учун мурожаат қилганларнинг қарийб 2,5 фоизида вирус қайд этилмоқда.
Таъкидланишича, коронавирус ташхиси қўйилган кишиларга натижа ҳақида тўғридан-тўғри айтилмайди. Уларга шунчаки ҳудудни тарк этишга рухсат берилмайди ва «шифокор билан маслаҳатлашиш» тавсия қилинади.
Туркманистон ҳукумати ҳалигача мамлакатга COVID-19 кириб келганини яширишга уринмоқда. Гарчи амалда инфекция борлигига шубҳа йўқ бўлса-да, амалдорлар бу ҳақда очиқдан очиқ гапиришга қўрқмоқда.
24 август куни ичида университет талабалари бўлган махсус поезд Туркманободдан Ашхободга йўл олганди. Лекин, turkmen.news манбаларига кўра, поезд Марига қайтарилган. Ўқишга юборилмаган талабалар поезддан тушгач, уч кун карантинда ўтирган.
23 августдан Ашхободда махсус патруллар дўконлар, жумладан, озиқ-овқат дўконларини ёпишни бошлади. «Беркарар» улгуржи бозори ва савдо маркази ёпилди. Бир қатор шифохоналарда кутилмаганда кўплаб беморлар гўё ўринларни бўшатиши керакдек, уйларига жўнатилди. Маъракаларни ташкил этишда санитария талаблари кучайтирилди: энди маърака чодирлари ичидаги ҳамма одамлар ниқоб тақмоқда, киришга эса антисептик қўйилади.
COVID-19 билан боғлиқ эпидемиологик вазият ёмонлашаётгани сабабли ўтган ҳафтада Ашхободдаги кўп қаватли уйларнинг кириш қисмини ва автобус салонларини дезинфекция қилиш ишлари қайта тикланди.
Полиция ниқобсиз одамларга 25 манат (76 минг сўм) жарима солмоқда. Пойтахтдаги корхона ва ташкилотлар ходимларидан эмланганлик гувоҳномаси талаб қилинмоқда, акс ҳолда уларнинг ишдан бўшатилиши айтилмоқда.
18 ёшдан ошган барча фуқароларни мажбурий эмлаш ҳақидаги қарор 7 июлда эълон қилинган бўлса-да, унинг ижроси энди бошланди. Эмланиш учун мурожаат қилаётган одамларнинг кескин оқими туфайли касалхона ходимлари вакцинацияни тасдиқловчи ҳужжатларни ўз вақтида расмийлаштиришга ва беришга улгурмаяпти.
turkmen.news манбалари хабар беришича, вилоятлардаги ҳолат ҳам пойтахтдан қолишмайди. Туркманбошида «Кенар» бозори, кафе ва гўзаллик салонлари аллақачон ёпилган. Туркманободда дўкон сотувчиларига яқин орада фақат сотувчилари эмланган савдо марказлари ўз ишини давом эттириши мумкинлиги айтилган. Аввалроқ Лебап вилоят ахлоқ тузатиш муассасалари ходимлари маҳбуслар орасида касалланиш ҳолатларининг кўпайиши туфайли кучайтирилган хизмат режимига ўтказилган эди.
«Хроника Туркменистана» хабарига кўра, коронавирус билан касалланганлар сони кескин ошгани сабабли расмийлар мустақилликнинг 30 йиллигига бағишланган парадни ташкил этиш тўғрисида бир тўхтамга кела олмаяпти — фақат ҳарбий парад билан чекланиладими ёки унга талабалар ва давлат хизматчилари жалб қилинадими, сўроқ остида.
Тахминларга кўра, мамлакатга коронавируснинг ўта юқумли дельта штамми кириб келган. Туркманистон ҳукумати мамлакатга коронавирус кириб келганини ҳали тан олмаган.
Изоҳ (0)