Пандемияга тайёрланиш ва унга нисбатан чоралар кўриш масаласида куз ойлари ўта аҳамиятли бўлади. Бу ҳақда Жаҳон соғлиқни сақлаш ташкилоти (ЖССТ) раҳбари Тедрос Гебрейесус Женевадаги брифингда айтиб ўтди, деб ёзади «РБК».
«Кейинги уч ой бўлажак пандемияга тайёргарлик кўриш ва унга жавоб чораларини белгилаш учун муҳим давр бўлади», — деди ЖССТ раҳбари.
Гебрейесуснинг қўшимча қилишича, бутун дунёда кунлик касалланиш ва ўлим ҳолатларига оид вазият барқарорлашди. «Аммо бу барқарорлик жуда юқори даражада — 4,5 миллиондан ортиқ касалланиш ва 68 000 ўлим ҳолати», — дея хулоса қилди у.
ЖССТ экспертларининг Nature журналига ёзган мақоласида маълум қилишича, COVID-19 пандемиясининг келиб чиқишини аниқлаш жараёни тўхтатилди.
«Биз SARS-CoV-2 вирусининг келиб чиқишини тушуниш учун ЖССТ ва Хитойдан мустақил халқаро гуруҳ аъзолари сифатида танлангандик. Бизнинг ҳисоботимиз шу йилнинг март ойида чоп этилган. У тўхтаб қолган жараённинг биринчи қадами бўлган бўлиши керак», — дея қайд этди экспертлар.
«SARS-CoV-2 нинг келиб чиқиши бўйича текширув ҳал қилувчи нуқтада ... энг муҳими: Хитойда ва ундан ташқарида одамлар ва ҳайвонларнинг биологик, ҳаётий жараёнларини кузатиш имкониятлари дарчаси жуда тез ёпилмоқда,» — деди экспертлар.
Уларнинг айтишича, пандемиянинг биринчи маълум эпицентри ҳисобланувчи Хитойнинг Ухань шаҳрида олиб борилган текширув пайтида тўпланган маълумотлар COVID-19 лабораториядан сизиб чиққанини тасдиқламайди.
Мутахассислар ушбу версия устида ишлашнинг ўрнига, 2019 йил декабргача антитаналар мавжудлиги ва касалланиш ҳолатлари ҳақидаги дастлабки хабарларни текшириш орқали Хитойда ва ундан ташқарида COVID-19 нинг дастлабки ҳолатларини излашга чақирди. Шунингдек, ЖССТ ходимлари ёввойи ҳайвонлар сақланадиган хўжаликларни текшириш ва кўршапалакларни ўрганиш зарур деб ҳисоблайди. Бироқ, ЖССТ бу нуқтаи назардан вақт омилининг аҳамиятини таъкидлади.
«SARS-CoV-2 га қарши антитаналар вақт ўтиши билан камаяди, шунинг учун 2019 йил декабргача вирусга чалинган бўлиши мумкин бўлган одамларнинг намуналарини йиғиш ва синовдан ўтказиш бундан кейин тобора камроқ натижа беради» — деб огоҳлантирди ЖССТ.
Улар, шунингдек, текширув учун қизиқ бўлиши мумкин бўлган ёввойи ҳайвонлар боқилган кўплаб фермалар аллақачон ёпилган, ҳайвонлар эса ўлдирилган бўлиши мумкинлигини айтди.
Ғарб оммавий ахборот воситалари, ЖССТ ходимларининг мақоласидан икки ҳафта олдин, ташкилот Хитойни COVID-19 нинг энг биринчи ҳолатлари ҳақида маълумот беришга чақирганини эслатмоқда. ЖССТ ходимларининг таъкидлашича, гап 2019 йил декабрь ойида мавжуд бўлган 174 та ҳолат ҳақида бормоқда, улар тўғрисида Хитой ҳукумати илгари айтишни истамаган.
Хитой АҚШни COVID-19 лабораториядан сизиб чиққани ҳақидаги версияни тарғиб қилишда айбламоқда
25 август куни Хитой Халқ Республикаси Ташқи ишлар вазирлигининг қурол-яроғ назорати бошқармаси бош директори Фу Цун COVID-19 нинг келиб чиқиши бўйича текширув тўхтаб қолганидан афсус билдирди. Фу Цуннинг сўзларига кўра, бунда ушбу илмий ишни ҳар доим қўллаб-қувватлаган Хитойнинг айби йўқ.
Пекинда таъкидланишича, Хитой текширув вируснинг бошқа мамлакатлардаги бошқа эҳтимолий манбаларига қаратилишини истайди.
Фу Цун, шунингдек, АҚШни COVID-19 пандемиясида Пекинни айбдор қилишга уринаётганликда айблади. Унинг таъкидлашича, АҚШ вируснинг лабораториядан оқиши назариясини атай тарғиб қилмоқда. Фу Цун, шунингдек, АҚШнинг ўзи ҳам ЖССТни бир қатор Америка илмий-тадқиқот лабораторияларини ўрганишга таклиф қилиши кераклигини айтди.
Аввалроқ АҚШ разведка хизмати президент Жо Байденга коронавируснинг келиб чиқиши ҳақидаги махфий ҳисоботни тақдим этганди. Қайд этилишича, ҳисобот хулосалари «тугалланмаган». COVID-19 ҳайвондан юқа бошлаганми ёки одамданми, вирус табиий келиб чиққанми ёки Ухандаги лабораторияда яратилганми — разведка хизматлари етарлича маълумот топа олмаган.
Изоҳ (0)