Туркманистон президенти Гурбангули Бердимуҳамедов Тошҳовузда 3 минг ўринли «Туркманларнинг оқ юрти» саноат мажмуаси қурилишига бағишланган тадбирда иштирок этди. Бердимуҳамедов мажмуа пойдеворига тилла капсула ётқизди, сўнг тилла аравачада олиб келинган бетоннинг биринчи партиясини тилла белкурак билан капсула устига ташлади.
Тадбирда Бердимуҳамедов «Оқ юрт» ишчиларига автобус совға қилди. Улар ўз навбатида, президентга атаб концерт уюштирди, унда «Аркадағ, сен пойдевор қўйдинг» ва «Аркадағнинг узоқ йиллари» қўшиқлари ижро этилди. Аркадағ — туркман тилидан «ҳомий» деб таржима қилинади. Бу ном ҳозирги президентнинг расмий ва энг кенг тарқалган унвони.
Тадбир сўнгида Туркманистон президенти хайр-эҳсон берди ва Ашхободга жўнаб кетди.
Аввалроқ Ашхобод шаҳрида Ўзбекистон ва Туркманистон ўртасидаги дўстлик муносабатлари шарафига «Тошкент» истироҳат боғини қуриш ишлари бошланганди. Қарийб 30 минг метр квадрат майдонда ландшафтли боғ, фавворалар, маданий-оммавий тадбирлар учун майдон ва саҳна, ўзбек таомлари тортиладиган икки қаватли чойхона, шунингдек, Тошкентнинг диққатга сазовор жойларига ўхшатиб ясаладиган 20 дан ортиқ объектлар жойлашади.
Тошкентда 2017 йил октябрида «Ашхобод» сайлгоҳи очилган.
17 февраль куни Гурбангули Бердимуҳамедов Ўзбекистон ташқи ишлар вазири Абдулазиз Комиловни қабул қилиб, Ашхободда «Тошкент» истироҳат боғи очилишини айтган эди.
Мавзуга доир:
- Бердимуҳамедов Туркманистон тарихидаги биринчи Олимпиада медали совриндорига квартира ва машина совға қилди
- Гурбангули Бердимуҳамедов ўғли билан бирга «Аваза»даги спортзалга борди (фото)
- Бердимуҳамедов Туркманистонда пахта ҳосилини мустақилликнинг 30 йиллиги муносати билан ҳар йилгидан бир ярим ой аввал териб олишни талаб қилмоқда
Изоҳ (0)