Мўғулистон эмлаш суръатлари бўйича Осиёда етакчилик қилмоқда, «Спутник V» 6 ойдан кейин иммунитетни кучайтиради. Коронахабарлар

Жонс Ҳопкинс университети маълумотларига кўра, дунёда коронавирусга чалинганлар сони 213 967 020 кишига етган, шуларнинг 4 464 245 нафари вафот этган. Касалланганлар сони бўйича АҚШ (38,2 миллион), Ҳиндистон (32,5 миллион), Бразилия (20,6 миллион), Франция (6,75 миллион) ва Россия (6,7 миллион) етакчилик қилмоқда.

Шунингдек, дунё бўйича қўлланилган вакциналар сони 5,062 миллиарддан ошган.

Мўғулистонда 25 август ҳолатига аҳолининг 68,6 фоизи COVID-19’га қарши вакцинанинг биринчи дозасини олган, 63,5 фоизи эса тўлиқ эмланган. Мўғулистон вакцинация суръатлари бўйича Осиё минтақасида етакчиликни сақлаб қолмоқда, дейилади Республика Соғлиқни сақлаш вазирлиги хабарида.

Мўғулистоннинг 2 067 391 нафар фуқаролари тўлиқ эмланган бўлса, 2 231 314 киши камида битта дозани олган.

Мамлакатда оммавий эмлаш 23 февралда бошланган.

Организмнинг коронавирус штаммларига қарши ҳимояси Россиянинг «Спутник V» вакцинаси билан эмлангандан кейин олти ой мобайнида кучаяди, дея маълум қилди Россия тўғридан-тўғри инвестициялар фонди Аргентинада ўтказилган тадқиқот натижаларига таяниб. Олимлар антитаналар шаклланиши ва уларнинг Алфа, бета, гамма, дельта ва лямбда штаммларига қарши зарарсизлантирувчи хусусиятини таҳлил қилди.

«Кузатувларга кўра, организмнинг иммунитетни ёриб ўтишга қодир мутациялардан иборат янги штаммларга қарши ҳимояси  вакцинациядан кейин олти ой давомида кучаяди, бу зарарсизлантирувчи антитаналар етилишда давом этиши ва уларнинг самарадорлиги ошиши билан боғлиқ», — дейилади фонд сайтида.

Аргентиналик олимлар «Спутник V» билан эмланган беморлардан олинган 1,8 мингта қон зардоби намуналарини текшириб чиқди.

IgG махсус антитаналар умумий сони аста-секинлик билан қисқарганига қарамай, уларнинг қаршилик кўрсатиш қобилияти кучайган, айниқса, бета ва гамма штаммларга нисбатан. Ушбу штаммлар «иммунитетдан қочиш»га энг кўп мойилдир, яъни касалланган одамнинг иммун тизимидан яшириниш хусусиятига эга.

Россияда коронавирусдан кунлик ўлимлар сони бўйича антирекорд ўрнатилди: ўтган бир кеча-кундузда мамлакатда 820 киши вирус оқибатида вафот этди, бу пандемия бошидан буён кузатилган янги рекорддир.

Бундан аввалги энг юқори кўрсаткич 14 августда қайд этилган, ўшанда 819 киши вафот этганди.

Шу тариқа, тезкор штаб маълумотлари бўйича, Россия коронавирус оқибатидаги ўлимлар сони жами 179,2 мингтага етди.

Шунингдек, бир кунда 19,6 минг кишида COVID-19 аниқланди. Касалланганлар ва ўлимлар сони бўйича Москва ва Петербург етакчилик қилмоқда.

Японияда Moderna компанияси вакцинаси билан эмлаш тўхтатилди. Бунга ушбу вакциналарда номаълум аралашмалар аниқлангани сабаб бўлди. Ушбу дозалар Японияга Испаниядан келтирилган. Япония Соғлиқни сақлаш, меҳнат ва фаровонлик вазирлиги текширув бошлади.

Ёт зарралар 39 та ампулада топилган, уларнинг катталиги бир неча миллиметрга етган. Вакцинанинг ушбу дозалари Япониянинг бешта префектурасида, шу жумладан, Токиода жойлашган вакцинация марказларида бўлган.

Ҳозирча ушбу ҳолат сабабли юзага келган муаммолар ҳақида хабарлар келиб тушмаган. Американинг Moderna компанияси ҳам текширув бошлаган.

Шунингдек:

• Колумбиянинг Кали шаҳрида яшовчи эркак коронавирусга қарши етти марта эмланди. У турли компаниялар, шу жумладан, Sinovac, AstraZeneca, Pfizer ва Janssen вакциналарини олган. Аммо, дозаларнинг кўплиги туфайли организм ҳеч қандай реакция кўрсатмаган. У 60 ёшдан ошган ва руҳий муаммолари бор одам бўлиб чиқди. Ҳукумат текширув бошлади.
• Грецияда 13 сентябрдан эмланмаганлар учун чекловлар жорий қилинади. Хусусан, уларнинг кафе, бар, ресторан, клубларга ҳамда кўнгилочар марказларга кириши тақиқланади. Шу билан бирга, манфий натижали ПЗР-тест билан улар театр, кино, музей ва тренажёр залларига кириши мумкин. Ушбу чекловлар 2022 йил 31 мартгача амал қилади.
• Польшада коронавируснинг тўртинчи тўлқини бошланмоқда. У сентябрь ва октябрда кучайиши кутилмоқда. Ҳукумат чекловлар киритишга тайёрланмоқда, аммо ҳозирча аниқ бир қарорлар йўқ.