Россия Афғонистондан ўзининг ва бошқа мамлакатларнинг фуқароларини эвакуация қилади

Россия Мудофаа вазирлиги Россия, Ўзбекистон, Беларусь, Қирғизистон, Тожикистон ва Украинанинг 500 дан ортиқ фуқароларини Афғонистондан эвакуация қилиш учун тўртта ҳарбий транспорт самолётини жалб қилди. Бу ҳақда «Интерфакс» хабар берди.

«Россия президенти Владимир Путиннинг топшириғига биноан Россия мудофаа вазири, армия генерали Сергей Шойгу 25 август куни Россия, Ўзбекистон, КХШТ (Коллектив хавфсизлик шартномаси ташкилоти)га аъзо давлатлар (Қирғизистон, Тожикистон, Беларусь) ва Украинанинг 500 дан ортиқ фуқароларини ҳарбий транспорт самолётлари билан Афғонистон Ислом Республикаси ҳудудидан эвакуация қилишни ташкиллаштирди», — дейилади вазирлик хабарда.

Мудофаа вазирлигининг хабар беришича, Шойгу эвакуация учун 4 та ҳарбий транспорт самолётидан иборат авиация гуруҳи ташкил қилган, улар энг қисқа вақт ичида Уляновск аэродромида тўпланган.

Вазирлик хабарига кўра, эвакуация учун ажратилган самолётларда «ҳарбий шифокорларнинг тиббий ҳамширалик бригадалари», ичимлик суви, кўрпа-тўшаклар, индивидуал озиқ-овқат рациони ва дори-дармонлар мавжуд. Хабарда Афғонистонга рейслар қачон амалга оширилиши айтилмаган.

Владимир Путин маълум қилишича, Россия Афғонистондаги вазиятни диққат билан кузатмоқда, шу билан бирга бу мамлакатга Россия қўшинлари жойлаштирилмайди. Унга кўра, Россия, айниқса, «ҳамма бир-бирига қарши» бўлган қуролли тўқнашувга аралашиш ниятида эмас.

«Биз бу вазиятни диққат билан кузатиб боряпмиз, КХШТдаги иттифоқчиларимиз билан фаол мулоқотдамиз. Албатта, биз Афғонистоннинг ички ишларига аралашмаймиз, Қуролли кучларимизни ҳамма бир-бирига қарши бўлган можаросига жалб қилмаймиз. Фикримча, бу мамлакатда бир неча ўн йиллардан бери давом этаётган зиддият содир бўлмоқда», — деди Путин «Ягона Россия» конгрессида.

Президентга кўра, бугун Афғонистондаги террорчиларнинг «Ғарб ўзидан қолдирган бетартибликлар»дан фойдаланиш хавфи бор. Шунингдек, Владимир Путин гиёҳванд моддалар савдосининг кўпайиши ва миграция муаммоларининг кучайиши мумкинлигига ишора қилди ва бу Россияга таҳдид солиши мумкинлигини таъкидлади.

Президент ҳукуматдан, Ташқи ишлар вазирлигидан ва хавфсизлик идораларидан, депутатлар билан биргаликда, мамлакат ва фуқаролар хавфсизлигини таъминлашнинг барча асосий йўналишлари бўйича саъй-ҳаракатларни кучайтиришни сўради.