Киевда Пётр Порошенконинг юзига «зелёнка» сепиб юборишди. Унинг фикрича, ҳужумда Владимир Зеленскийнинг қўли бор (видео)

Украинанинг бешинчи президенти, Олий Рада депутати Пётр Порошенкога Киев марказидаги Крешчатик кўчасида ҳужум уюштирилди. Бу ҳақда полицияга таяниб, Meduza хабар берди.

Порошенко Украина мустақиллигининг 30 йиллигига бағишланган Ҳимоячилар маршида иштирок этган. Тадбирда бир йигит унга «зелёнка» сепиб юборган. «Зелёнка» Порошенконинг юзига тўкилган.

Бироз ўтиб, ҳужумчи қўлга олинди. Уни ҳибсга олишга камида олти нафар ҳуқуқ-тартибот ходими жалб қилинди.

https://www.facebook.com/100045234892974/videos/279287873565667

Полиция маълумотларига кўра, ҳужумда Чернигов вилоятида яшовчи 1999 йилда туғилган шахс гумон қилинмоқда. Киевнинг «Столица» Telegram каналида унинг сурати эълон қилинди. Қўлга олинган шахсга нисбатан безорилик моддаси бўйича жиноят иши очилган.

Воқеадан кейин Порошенко ўз тарафдорлари олдида сўзга чиқиб, ҳужумга Украинанинг амалдаги президенти Владимир Зеленскийнинг алоқаси борлигини айтди. «Буни айтишни истамагандим, лекин айтишим керак. Владимир Александрович, тушунаман, бу қўрқинчли. Мен тушундимки, сиз Путиндан ҳам кўпроқ кўнгиллилардан, ҳарбийлардан, ҳақиқий ватанпарварлардан қўрқасиз. ‘Зелёнка’ билан бизни тўхтатишга уринманг », — дея Порошенконинг сўзларини келтирди унинг «Европа бирдамлиги» партияси.