23 август куни Ўзбекистон Президентининг «Сурхондарё вилоятида қулай инвестиция муҳитини яратиш, кичик бизнес ва оилавий тадбиркорликни рағбатлантириш юзасидан қўшимча чора-тадбирлар тўғрисида»ги ПҚ-5228 сонли қарори эълон қилинди, деб хабар беради «Gazeta.uz».
Қарорга мувофиқ, ҳудудда кичик бизнес ва оилавий тадбиркорликни рағбатлантириш, рақобатбардош маҳсулотлар ишлаб чиқариш ҳамда уларнинг экспортини қўллаб-қувватлаш, аҳоли бандлигини таъминлаш ва даромадини ошириш бўйича маҳаллабай ишлаш тизимининг самарадорлигини ошириш мақсадларида Тикланиш ва тараққиёт жамғармаси томонидан 100 миллион доллар эквивалентидаги ва 50 миллион доллар миқдоридаги маблағ, шунингдек, халқаро молия институтларидан қўшимча жалб қилинаётган қарз маблағлари ҳисобидан 50 миллион доллар эквивалентидаги маблағ йўналтирилади.
Тикланиш ва тараққиёт жамғармаси томонидан ажратилган маблағлар қуйидагича тақсимланиши белгиланган:
- 30 миллион АҚШ доллари эквивалентидаги маблағлар 3 йиллик имтиёзли даврни ҳисобга олган ҳолда, йиллик 10 фоиз ставкада, 7 йил муддатга «Миллий банк» АЖ ва ушбу банк томонидан бошқа тижорат банкларига молиявий ресурс ажратиш орқали «Бир маҳалла — бир маҳсулот» тамойили асосида амалга ошириладиган лойиҳаларга кредит бериш учун. Бунда, тижорат банклари, шу жумладан, «Миллий банк» АЖ тадбиркорлик субъектларига Марказий банкнинг асосий ставкасига тенг бўлган йиллик фоиз ставкасида кредитлар ажратади;
- 10 миллион АҚШ доллари эквивалентидаги маблағлар «Туронбанк» АТБ устав капиталидаги Тикланиш ва тараққиёт жамғармасининг улушини ошириш орқали Сурхондарё вилоятида лимончилик лойиҳаларини молиялаштириш учун;
- 60 миллион АҚШ доллари эквивалентидаги маблағлар ижтимоий-иқтисодий ривожланиш даражаси паст ва ишсизлик даражаси нисбатан юқори бўлган маҳаллаларда «етакчи» тадбиркорлик субъектларининг лойиҳаларини молиялаштириш учун «Миллий банк» АЖга ва ушбу банк томонидан бошқа тижорат банкларига молиявий ресурс ажратиш орқали 3 йиллик имтиёзли давр, йиллик 7 фоиз ставкада 7 йилга ҳар бир маҳалла учун 2 миллиард сўмгача;
- 50 миллион АҚШ доллари миқдоридаги маблағлар импорт ўрнини босувчи маҳсулотлар ишлаб чиқариш лойиҳаларини молиялаштириш, зарур инфратузилмани яратиш ва экспортёрларни айланма маблағлар билан таъминлаш учун «Миллий банк» АЖга ва ушбу банк томонидан бошқа тижорат банкларига молиявий ресурс ажратиш орқали 3 йиллик имтиёзли давр, йиллик 2,5 фоиз ставкада 10 йилга.
Шунингдек, мазкур қарорга мувофиқ, ҳудудда рўйхатдан ўтган ва фаолият юритадиган тадбиркорлик субъектлари бир қатор солиқ ва божхона тўловларидан озод қилиниши кўзда тутилган.
Аввалроқ Ўзбекистонда тадбиркорларга кредитни миллий валюта — сўмда бериш тизими йўлга қўйилиши, Ўзбекистон тижорат банкларига Тикланиш ва тараққиёт жамғармасидан яна 600 млн доллар ажратилиши тўғрисида хабар берилганди.
Изоҳ (0)