Наманганда фуқаронинг ўқишини кўчириб беришни ваъда қилган талаба ва унинг шериклари қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Янгиқўрғон тумани бўлими томонидан ДХХнинг Наманган вилояти бошқармаси билан ҳамкорликда тезкор тадбир ўтказилган. Тадбир давомида Наманган давлат университети талабаси А.Қ. фуқаро А.нинг ўқишини Ўш давлат университетидан ўзи таълим олаётган университетга ваколатли танишлари орқали кўчириб беришни ваъда қилгани аниқланган. Бунинг эвазига у 1000 доллар ва 5,3 миллион сўмни олган вақтида ашёвий далиллар билан ушланган.
Шунингдек, А.Қ.нинг кўрсатувига асосан давом этган тадбирларда университет ўқитувчилари М.А. ва Б.А. ушбу пулларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бухоро тиббиёт институтига ўқишга киритиш эвазига фуқародан 5600 доллар олган андижонлик йигит қўлга олингани, Андижонда 3 минг доллар эвазига талабанинг ўқишини Тошкент давлат юридик университетига кўчириб бермоқчи бўлган шахс ушлангани тўғрисида хабар берилганди.
Изоҳ (0)