Кобул аэропортида отишмадан кейин ёнғин ҳам содир бўлди. Бу ҳақда Al Arabiya ҳамда Мисрнинг Аhram нашри хабар тарқатган.
Ижтимоий тармоқларда аэропорт ҳудуди тутун билан қоплангани акс этган видеолар тарқалган. Бироқ қаерда нима ёнаётганини англаш қийин.
Аввал Бундесвер 23 август тонгида Афғонистон пойтахтидаги халқаро аэропортда афғон ҳарбийлари ва номаълум кучлар ўртасида отишма содир бўлгани ҳақида хабар қилганди. Отишма оқибатида бир нафар афғон аскари ҳалок бўлган, уч киши жароҳатланган. Маълумотларга кўра, отишмада Германия ва АҚШ ҳарбийлари ҳам иштирок этган.
«Толибон» ҳаракати Афғонистонни эгаллаганини эълон қилганидан кейин Кобул аэропорти минглаб афғонистонликлар ва хавфсиз жойга эвакуация қилинишни истаётган хориж давлатларининг фуқаролари билан тўлган. Аэропортдаги ҳамма бошқа жойга самолётда учиб кетиш ҳаракатига тушган.
Кобулга ҳар бири 400 нафар одамни сиғдира оладиган ва эвакуация қиладиган АҚШ ҳарбий ҳаво кучларининг 33 та C-17 самолётлари келиши кутилмоқда. Афғонистонда тижорат рейсларининг парвози тўхтаган. АҚШ президенти Жо Байден июль бошидан бери Афғонистондан 33 минг нафар фуқаро эвакуация қилинганини билдирган.CNN телеканалининг ахборотига кўра, Қўшма Штатлар аэрпортдаги саросима туфайли мазкур ҳудудга фақат АҚШ ҳамда НАТОга аъзо давлатларнинг фуқаролари, шунингдек, Green Card эгаларини киритиш ҳақида қарор қабул қилган.
Изоҳ (0)