АҚШ ҳукумати «Толибон» қўлига ўтган Афғонистонни тарк этишнинг охирги имкони бўлган Кобул аэропортига киришни чеклашга қарор қилди. Бу ҳақда манбасига таяниб, CNN хабар берди. Аэропортга фақат АҚШ ва НАТО мамлакатлари фуқаролари, шунингдек, грин-карта эгалари кириши мумкин. Номзодларни фильтрлашда энди «Толибон» ёрдам беради.
Телеканал суҳбатдошининг аниқлик киритишича, АҚШнинг махсус иммиграцион визаси (АҚШ ҳукумати кучлари ва идораларига ишлаганлар учун мўлжалланган) дастурида қатнашиш учун ариза берган афғонлар ҳам аэропортга қўйилмайди.
Манбага кўра, «Толибон» аэропортга кираверишда ҳужжатларни текширишга ёрдам беради. АҚШ ва НАТО мамлакатлари фуқаролари ўзлари билан фақат оила аъзоларини — турмуш ўртоғини ёки болаларини олиб кетиши мумкин.
Манбанинг айтишича, аэропортда республикани тарк этмоқчи бўлган 20 минг киши бор. Уларнинг кўпчилиги армия ёшидаги ҳужжатсиз афғонистонлик эркаклар. Шу тарзда аэропортда бетартиблик сақланиб қолмоқда. Бунинг сабабларидан бири аризачиларга уларнинг исми ёки ҳужжат рақами кўрсатилмаган электрон визаларни бериш ҳақидаги қарор бўлган. Афғонлар бу визаларни скриншот кўринишида аэропортга кира олмаган бошқа фуқароларга юборишган.
«Консулхона ёки маъмурият, очиғини айтганда, бу аҳмоқона визани юбориш, аэропортга ҳаммани кетма-кет 24 соатга киргизиш билан қандай ёмон иш қилганини тушунмайди, деб ўйлайман», — деди манба. Унинг сўзларига кўра, аэропортдагиларнинг ҳаммасини яқин тўрт кун ичида олиб чиқишнинг иложи йўқ.
Кейинги 24 соат ичида АҚШ ҳарбий ҳаво кучларига тегишли C-17 33 самолёти Кобулга учиши керак, уларнинг ҳар бири 400 кишини эвакуация қилиши мумкин. Афғонистонга тижорий рейслар учмайди, эвакуация ҳарбий транспортлар томонидан амалга оширилмоқда.
Шу билан бирга, «Толибон» вакили Суҳайил Шоҳиннинг айтишича, афғонларнинг мамлакатни тарк этишга интилиши қўрқувдан эмас. «Улар Ғарб мамлакатларига кўчиб ўтишни хоҳлайди. Бу иқтисодий миграциянинг бир тури. Афғонистон камбағал мамлакат, аҳолининг 70 фоизи қашшоқлик ёқасида яшайди, шунинг учун ҳамма Ғарб давлатларига кўчиб ўтишни хоҳлайди, улар фаровон ҳаётни истайди. Гап қўрқувда эмас», — деди у Sky News’га берган интервьюсида.
Суҳайл Шоҳиннинг сўзларига кўра, АҚШ ва Буюк Британияга эвакуация учун қўшимча вақт берилмайди. Агар хорижий контингент белгиланган санага — 31 августга қадар мамлакатни тарк этмаса, у ҳолда ҳаракат тарафидан жавоб кўрсатилади.
Аввалроқ Кобул аэропорти яқин икки кунга ёпилиши, бу аллақачон унинг ҳудудида бўлиб турган одамларни эвакуация қилиш учун кераклиги маълум қилинган эди. Шунингдек, «Толибон» жангарилари Кобул аэропортидаги эвакуация жараёнига аралашишга уринган тақдирда, АҚШ уларга тезда жавоб қайтариши ҳақида огоҳлантирган.
«Толибон» Кобул аэропортидаги эвакуация ишларига аралашмасликка ваъда берган. Аммо америкаликлар ва уларнинг иттифоқчилари билан ҳамкорлик қилган афғонистонликлар «Толибон» уларнинг кетишига тўсқинлик қилишидан қўрқмоқда.
The New York Times хабарига кўра, «Толибон» сўроқ қилиш ва жазолаш учун АҚШ ҳарбийлари билан ҳамкорлик қилган афғонларни қидира бошлаган. NYT таъкидлашича, «Толибон» рўйхатдаги одамларни, жумладан, Кобул аэропорти яқинидан ҳам қидирмоқда, аэропорт ҳозир мамлакатни тарк этиш мумкин бўлган ягона жой.
Изоҳ (0)