Qozog‘iston prezidenti Qosim-Jo‘mart To‘qayev davlat organlari vakillari bilan uchrashuvda Afg‘onistondagi vaziyatga tezkor javob choralarini muhokama qildi. Bu haqda Qozog‘iston prezidenti matbuot kotibi Berik Ualiga tayanib, “TASS” xabar berdi.
Foto: Nur.kz
“Afg‘oniston Islom Respublikasidagi vaziyat bo‘yicha Qozog‘iston milliy manfaatlarini va mamlakatimiz fuqarolarining xavfsizligini ta’minlash masalalarini hisobga olgan holda tezkor choralar ko‘rish masalasi muhokama qilindi. Prezident tegishli idoralarga Afg‘onistondagi vaziyatning rivojlanishini har tomonlama kuzatishda davom etish vazifasini yukladi, ushbu mamlakat bilan keyingi hamkorlik to‘g‘risida qaror qabul qilish uchun bu juda muhim”, — deb yozdi Uali Facebookdagi sahifasida.
Uning xabariga ko‘ra, yig‘ilishda respublika bosh vaziri Asqar Mamin, shuningdek, Milliy xavfsizlik qo‘mitasi, Tashqi ishlar, Mudofaa, Ichki ishlar, Favqulodda vaziyatlar vazirliklari, Bosh prokuratura, Davlat xavfsizlik xizmati rahbarlari va Xavfsizlik kengashi kotibi ishtirok etgan.
15-avgust kuni Qozog‘iston Tashqi ishlar vazirligining rasmiy vakili Oybek Smadiyarov “TASS”ga bergan intervyusida ma’lum qilishicha, Afg‘onistonda Qozog‘iston fuqarolari yo‘q, mamlakatda qolgan diplomatik missiya xodimlari bundan mustasno. Uning ta’kidlashicha, Afg‘oniston poytaxtidagi Qozog‘iston elchixonasi o‘z ishini davom ettiradi, lekin qisqartirilgan tarkibda.
Eslatib o‘tamiz, 15-avgust kuni “Tolibon” Afg‘onistonning butun hududini o‘z nazorati ostiga olganini e’lon qildi. Shu kuni “Tolibon” Kobuldagi prezident saroyiga kirdi. Keyinroq hukumat kuchlari tark etgan barcha davlat muassasalarini va davlat televideniyesini egallab oldi.
Afg‘oniston prezidenti Ashraf G‘ani iste’fo berishga rozi bo‘lgan va mamlakatni tark etgan. The New York Times va Al Jazeera Ashraf G‘anining O‘zbekistonga yo‘l olgani haqida xabar berdi. Ammo keyinroq Ashraf G‘ani O‘zbekistonda ham, Tojikistonda ham, Qozog‘istonda ham emasligi ma’lum qilindi.
Mavzuga doir:
