Боливия собиқ аёл президенти Жанин Анес қамоқхонада ўз жонига қасд қилишга уринди

Давлат тўнтариши ҳақидаги иш бўйича ҳибсга олинган Боливиянинг собиқ аёл президенти Жанин Анес қамоқхонада ўз жонига қасд қилишга уринди. Бу ҳақда Reuters унинг адвокатларига таяниб хабар берди.

Анеснинг ҳимоячилари сўзларига кўра, у танасининг бир нечта қисмига кесиб жароҳат етказган. Ушбу ҳодисани улар «ёрдам ҳақидаги ҳайқириқ» деб атади.

Мамлакат ички ишлар вазири Карлос дел Кастилё Анес ўзига зарар етказишга уринганини тасдиқлади ва ҳозир унинг ҳаётига ҳеч нарса хавф солмаётгани, унга барча зарур тиббий ёрдам кўрсатилаётганини қўшиб қўйди.

Миллий полиция Жиноятчиликка қарши кураш махсус бўлинмаси раҳбари Дуглас Азкуиано, ўз навбатида, Анес билан бўлган воқеа ўз жонига қасд қилишга уриниш деб баҳоланиши мумкинлигини айтди.

Жанин Анес Боливия сенатида иккинчи вице-спикер ва мухолифат етакчиси бўлган. 2019 йил ноябрида, Боливияда сиёсий инқироз юз берганида, 13 йил давомида мамлакат раҳбари лавозимини эгаллаб келган Эво Моралесни истеъфога юборган Анес ўзини янги сайловларга қадар президент вазифасини бажарувчи деб эълон қилди, 2020 йил октябрида мамлакатда янги сайловлар бўлиб ўтди, унинг якунларига кўра, Моралеснинг маслакдоши Луис Арсе президент бўлди.

2021 йил мартида Анес ва унинг маъмуриятидаги бир нечта юқори мансабли амалдорлар давлат тўнтаришини уюштирганлик ва унда қатнашганлик айблови билан ҳибсга олинди. Шунингдек, Анес Боливияда норозилик намойишлари чоғида 20 кишининг ўлимига алоқадорликда ҳам айбланиши мумкин.

Анес айбловларни рад этиб, сиёсий таъқиб қурбонига айланганини айтмоқда. Собиқ президентнинг адвокатлари унинг соғлиғи туфайли ҳибсдан озод қилинишига эришишга уринди, аммо уларнинг сўрови рад этилди.