Деярли бутун Афғонистонни назорати остига олган «Толибон» ўзини қаршилик кучлари етакчиси деб эълон қилган Аҳмад Масъудга ультиматум қўйди. 22 август куни эълон қилинган видеода «Толибон» Панжшер вилоятининг бир қисмини ушлаб турган тарафдорлари қуролларини ташлаши учун Масъудга тўрт соат вақт беришини айтди. «Толибон» баёнотига кўра, акс ҳолда қаршилик жангчилари «жазоланади». Мурожаатга «Толибон»нинг Панжшерга қараб кетаётгани акс этган видеотасвирлар илова қилинган.
Шунингдек, жангарилар вилоятга ҳужум қилишга тайёргарлик кўраётганини қайд этди. Панжшер Афғонистонда «Толибон» ҳукмронлиги ўрнатилмаган ягона минтақадир. Вице-президент Амрулла Солиҳ ва «Толибон»га қарши коалициянинг собиқ раҳбари Аҳмад Шоҳ Масъуднинг ўғли Аҳмад Масъуд қаршилик кучларига раҳбарлик қилмоқда. Афғонистон президенти Ашраф Ғани қочиб кетганидан сўнг, Солиҳ ўзини давлат раҳбари деб эълон қилган ва «Толибон»га қуролли қаршилик кўрсатишга чақирган.
Аввалроқ «Толибон» вакили Россия элчихонаси орқали қаршилик кучларига сиёсий хабар етказган. «‘Толибон’ ўз баёнотида ҳали вилоятни куч билан босиб олиш учун ҳаракатга киришмагани ва келишувга умид билдираётганини маълум қилди», — деди Россия элчиси Дмитрий Жирнов. Жангарилар Солиҳдан кўра «маданиятлироқ» эканлигини айтди, дея қўшимча қилди дипломат.
Масъуд Asharq al-Awsat’га берган интервьюсида музокаралар йўли орқали «Толибон» билан қўшма ҳукумат тузишга тайёрлигини маълум қилди. Унинг сўзларига кўра, мамлакатда экстремистик ҳукумат тузиш қабул қилинмайди, чунки бу Афғонистоннинг ўзи учун ҳам, минтақа учун ҳам таҳдидга айланади. «Агар улар қурол билан Панжшерга кирса, биз сўнгги одамимизгача ҳимоя қилишга тайёрмиз, аммо тинчлик яратишга имкон бериш керак, гарчи бу тинчлик ‘Толибон’ билан бўлса ҳам» — деди Масъуд.
Ультиматумдан кўп ўтмай «Толибон» Панжшер вилоятига «юзлаб жангчиларини» юборганини маълум қилди. «Ислом амирлигидан юзлаб мужоҳидлар Панжшерга қараб йўл олмоқда, маҳаллий расмийлар уни тинч йўл билан топширишдан бош тортгани сабабли мужоҳидлар минтақани ўз назоратига олмоқчи», — дея «Толибон» баёнотидан иқтибос келтирди The Economic Times нашри.
Изоҳ (0)