Туркияда концертлар ва кинотеатрларга ташриф буюриш учун ПЗР-тест топшириш мажбурий бўлади, ушбу чора эмланмаган фуқароларга тегишли бўлади. Бу ҳақда Туркия президенти Ражаб Тоййиб Эрдўғон маълум қилди, деб ёзади «РБК».
«Биз вакцина олмаган талабалар ва университетлар ходимларидан мунтазам равишда ПЗР-тестлар топшириб туришни сўраймиз. Биз, шунингдек, парвозлар, шаҳарлараро сафарлар ҳамда кинотеатр ва концертларга кириш учун мажбурий тестдан ўтишни жорий қиламиз», — деди Эрдўғон.
Унинг сўзларига кўра, 6 сентябрда ўқув йили бошланиши билан мактабларнинг эмланмаган ўқитувчилари ва бошқа ходимлари бир ҳафтада камида икки марта ПЗР-тест топшириши керак бўлади.
Туркия Соғлиқни сақлаш вазирлиги маълумотларига кўра, ўтган бир кеча-кундузда мамлакатда коронавирусга чалиниш бўйича 19,3 мингта ҳолат аниқланган, 216 киши вафот этган. Республикада пандемия бошидан буён касалланганлар сони 6,1 миллионга, ўлимлар эса 53,8 мингга етган.
Апрель ойи ўрталарида Туркия ҳукумати COVID-19 га чалиниш ҳолатининг ортиши муносабати билан чеклов чораларини кучайтирди. Мамлакатда комендантлик соати давомийлиги соат 19:00 дан 05:00 гача узайтирилди. Май ойида Туркияда янги чора-тадбирлар кучга кирди, унга кўра, дўконларда фақат асосий озиқ-овқат ва гигиена маҳсулотларини сотишга рухсат берилди.
17 майдан мамлакатдаги карантин режими босқичма-босқич юмшатила бошлади. Хусусан, 1 июндан комендантлик соати қисқартирилиб, тўйларга рухсат берилди.
1 июлдан эса коронавирус фонида қўйилган чекловларнинг бир қисми бекор қилиниши эълон қилинди. Шу жумладан, комендантлик соати бутунлай бекор қилинди.
Изоҳ (0)