«Толибон» ҳаракати жангарилари НАТО ва АҚШ ҳарбийларига ёрдам берган Афғонистон аҳолисини қидиришни кучайтирди. Бу ҳақда RHIPTO Норвегия глобал таҳлил маркази томонидан БМТ учун тайёрланган ҳисоботга асосланиб, The New York Times хабар берди.
Ҳужжатда айтилишича, «Толибон»да америкаликлар билан ҳамкорлик қилганларнинг рўйхати ва манзиллари бор. «Толибон» уларни, «сўроқ қилиб, жазоламоқчи». Жангарилар ушбу манзилларга бориб, агар ўз ихтиёри билан таслим бўлмаса, қидирувдагиларнинг қариндошларини ҳибсга олиш ва ўлдириш билан таҳдид қилмоқда.
«Толибон» рўйхатига, хусусан, афғон полициячилари, ҳарбийлари ва тергов органлари ходимлари киритилган.
NYT таъкидлашича, «Толибон» рўйхатдаги одамларни жумладан Кобул аэропорти яқинидан ҳам қидирмоқда, аэропорт ҳозир мамлакатни тарк этиш мумкин бўлган ягона жой.
Reuters агентлиги ҳам ушбу ҳисоботга асосланиб, «Толибон» Афғонистоннинг аввалги маъмурияти ёки АҚШ кучлари билан муҳим лавозимларда ишлаган кишиларнинг қора рўйхатини туза бошлагани ҳақида хабар берди.
Агентлик хабарига кўра, ҳисоботга эски тузумнинг шериги деб гумон қилинган кишига ёзилган мактуб ҳам киритилган. Reuters ёзишича, уни шу ҳафта Кобулдаги квартирасидан олиб кетишган ва Афғонистоннинг олдинги ҳукуматидаги ўрни ҳақида сўроқ қилишган. Афғонистон Ислом Амирлигининг ҳарбий комиссиясидан келган мактубда айтилишича, маҳбус Буюк Британияга ўз вазифаларини бажариш учун борган. Мактуб муаллифларига кўра, бу унинг «америкаликлар ва британияликар билан яхши муносабатда бўлганидан» далолат беради.
«Агар комиссияга келмасангиз, сизнинг ўрнингизга оила аъзоларингиз ҳибсга олинади ва бунинг учун жавобгарлик сизнинг зиммангизга тушади. Сизга ва қариндошларингизга шариат қонунларига мувофиқ муомала қилинади», — дейилади мактубда.
«Толибон» ҳокимиятни эгаллагач, ҳаракатнинг Қатар сиёсий идораси вакили Муҳаммад Суҳайл Шоҳин «Толибон» Ғарб кучлари билан ҳамкорлик қилган афғонларни жазоламаслигини ваъда қилганди. Уларнинг мамлакатни тарк этишига ҳеч қандай асос йўқ, деган эди Шоҳин.
Аввалроқ, АҚШ қўшма махсус операциялар қўмондонлигидаги манбаларига таяниб, The Intercept «Толибон» ҳужум пайтида АҚШ ҳарбийларининг шахсни аниқловчи портатив ускуналарини (HIIDЕ) тортиб олгани ҳақида хабар берганди.
HIIDЕ қурилмалари биометрик (кўз пардаси, бармоқ излари) ва биографик маълумотларни ўз ичига олади ва йирик марказлашган маълумотлар базаларига кириш учун ишлатилади. Уларнинг ёрдами билан «Толибон» АҚШга ишлаган афғонларни аниқлай олади. Нашр суҳбатдошининг таъкидлашича, жангариларда HIIDЕ маълумотларини қайта ишлаш учун зарур воситалар йўқ. Бироқ улар Покистонда бор, The Intercept ёзишича, Покистон «Толибон»ни қўллаб-қувватлайди.
CNN АҚШ Вакиллар палатаси аъзоси Энди Кимнинг идорасига таяниб хабар беришича, «Толибон» ғалабасидан кейин Кобулдаги АҚШ элчихонаси эвакуация қилинишидан олдин асбоб-ускуналар ва ҳужжатларни йўқ қилиш мобайнида бир нечта афғон фуқароларининг паспортларини ҳам йўқ қилган. Бундай ҳаракатларнинг сабаби аниқланмаган.
Изоҳ (0)