«Толибон» ҳаракати 19 август, пайшанба — Афғонистон Мустақиллик кунида ўзларининг АҚШ устидан ғалабасини эълон қилди. Бу ҳақда CNN «Толибон» баёнотига таяниб хабар бермоқда.
«Бугун биз Британия истилосидан мустақил бўлган кунимизни нишонлаяпмиз (1919 йилда учинчи инглиз-афғон урушидан кейин), айни пайтда эса биз… яна бир бақувват ва кибрли кучни енгиб, уни Афғонистоннинг пок еридан кеткиза олдик», — дейилади «Толибон» баёнотида.
Унда айтилишича, Афғонистон халқи «кетма-кет уч аср давомида учта киборли империя устидан» ғалаба қилган. CNN аниқлик киритишича, булар Буюк Британия, Собиқ иттифоқ ва АҚШ.
CNN маълумотларига кўра, кейинроқ «Толибон» бутун Афғонистон имомларига мурожаат қилиб, жума намозлари чоғида фуқароларни мамлакатнинг бўлғуси ҳукумати билан ҳамкорлик қилишга кўндиришга даъват этди.
Аввалроқ Афғонистон шарқидаги Кунар вилоятининг Асадобод шаҳрида бўлиб ўтган митингда бир неча киши ҳалок бўлган, Мустақиллик кунига бағишланган митинг иштирокчилари миллий байроқларни силкитаётган пайтида «Толибон» жангарилари ўт очишни бошлаган эди.
Шунингдек, АҚШ қўшинларининг Афғонистондан олиб кетилиши кечиктирилиши мумкинлиги маълум бўлди. Афғонистондан АҚШ фуқароларини эвакуация қилиш учун зарур бўладиган бўлса, Америка қўшинлари у ерда 31 августдан кейин ҳам қолиши мумкин, дея маълум қилди Жо Байден.
Изоҳ (0)