Афғонистон собиқ ички ишлар вазири «Толибон» тузаётган вақтинчалик ҳукумат раҳбарлигига тайинланганини инкор этди

Афғонистон собиқ ички ишлар вазири, Вашингтондаги Миллий мудофаа университети профессори Али Аҳмад Жалолий мамлакат «Толибон» назоратига ўтганидан кейин тузилаётган вақтинчалик ҳукуматга раҳбарлик қилиши ҳақидаги хабарларни рад этди, дея хабар қилган «Интерфакс».

«Ижтимоий тармоқларда мени муваққат ҳукуматнинг раҳбарлигига тайинланганим ҳақида турли мишмишлар тарқалди. Бундан хабарим йўқ, ҳеч ким мени таклиф қилмаган ва ушбу лавозимни эгаллашга қизиқиш билдирмаганман», — дея ёзган Жалолий Twitter’даги саҳифасида.

«Айрим ёлғон ахборот тарқатувчилар сохта саҳифаларда менинг номимдан ва бир вақтлар айтган сўзларимдан фойдаланиб, уйдирма гаплар ёзмоқда. Мен ушбу хабарларни фейк деб ҳисоблайман. Бундай ахборотларга ишонманг», — деган собиқ вазир.

Эслатиб ўтамиз, «Толибон» ҳаракати 15 августда Афғонистон пойтахти Кобулни эгаллади ва мамлакатда тўлиқ назорат қилишни бошлади. Президент Ашраф Ғани истеъфога чиққанини эълон қилиб, Афғонистонни тарк этган.

Шу куннинг ўзида «Толибон» Афғонистонда ҳокимият тепасига қайтганидан кейин тузиладиган вақтинчалик ҳукуматга раҳбарлик қилиш Али Аҳмад Жалолийга топширилиши ҳақида хабарлар тарқалган.

Шунингдек, Tolo News телеканали «Толибон» вакилларининг Доҳада Афғонистонда янги ҳукумат шакллантириш юзасидан музокаралар олиб бораётгани ва мазкур мулоқот бўйича яқин вақт ичида расмий маълумот эълон қилиниши ҳақида хабар берган.

«Толибон» вакилининг телеканалга берган ахборотига кўра, ҳаракат етакчилари Афғонистон сиёсий кучлари ва дунё ҳамжамияти бирлашмалари билан мазкур мавзуда мулоқот олиб бормоқда.

Tolo News’нинг қайд этишича, «Толибон» мулоқотлар давомида ҳукуматнинг келажаги, тузилмаси ва номи борасида муҳокамалар ўтказилмоқда.