Байден афғонистонлик қочқинларга ёрдам бериш учун 500 млн долларгача маблағ ажратади

АҚШ президенти Жо Байден афғонистонлик қочқинларга ёрдам бериш учун 500 миллион долларгача маблағ ажратишга қарор қилди. Бу ҳақда Оқ уй сайтида эълон қилинган меморандумда айтилган.

«500 миллион доллардан ортиқ бўлмаган миқдорда ёрдам кўрсатиш миллий манфаатлар учун муҳим», — дейилади меморандумда.

Ҳужжатда, шунингдек, маблағ Афғонистондаги вазият натижасида хавф остида қолган «қочқинлар, зиддият қурбонлари ва бошқаларнинг фавқулодда эҳтиёжларини қондиришга» йўналтирилиши кераклиги айтилган.

Ҳужжатда айтилишича, шу хилдаги ёрдам икки томонлама ёки кўп томонлама, жумладан, халқаро ташкилотларга пул ажратиш ва бошқа нодавлат ташкилотларини, шунингдек, АҚШ департаментлари ва агентликларини молиялаштириш орқали кўрсатилиши мумкин.

Аввалроқ Байден Афғонистондаги вазият ҳақида баёнот берган эди. АҚШ президенти қўшинларни олиб чиқиш қароридан афсусланмаслигини таъкидлаб, мамлакатдаги вазият кутилганидан ҳам тез ривожланаётганини қўшимча қилди.

Байден, агар «Толибон» америкаликларга ҳужум қилса, АҚШнинг яшин тезлигидаги жавобини ваъда қилди, шунингдек, Афғонистон халқини, уларнинг ўз ҳуқуқларини ҳимоя қилишини қўллаб-қувватлашга ваъда берди.

Европа Парламенти АҚШнинг Афғонистондан чиқиб кетишини шошма-шошарлик деб атаган ва ундан кейинги воқеалардан чуқур хавотир билдирганди. Шу билан бирга, европалик депутатлар вазиятнинг гуманитар жиҳатларига алоҳида эътибор қаратиб, чет элликларнинг, шунингдек, мамлакатни тарк этмоқчи бўлган афғонларнинг хавфсиз чиқиб кетишига ёрдам бериш зарурлигини айтган.

Эслатиб ўтамиз, 15 август куни «Толибон» Афғонистоннинг бутун ҳудудини ўз назорати остига олганини эълон қилди. Шу куни «Толибон» Кобулдаги президент саройига кирди. Кейинроқ ҳукумат кучлари тарк этган барча давлат муассасаларини ва давлат телевидениесини эгаллаб олди.

Афғонистон президенти Ашраф Ғани «Толибон» Кобулни эгаллаганидан кейин истеъфога чиққанини эълон қилиб, мамлакатдан хорижга чиқиб кетди. 16 августда афғон махсус қўшинлари тарқатиб юборилди.