Фарғонада ўзи билан ишқий муносабатда бўлган эркак видеосини тарқатмаслик эвазига ундан 150 минг доллар талаб қилган аёл ва шерикларига суд ҳукми ўқилди

Фарғона шаҳрида яшовчи аёл ўзи билан ишқий муносабатда бўлган эркакнинг видеосини ижтимоий тармоқлар орқали тарқатмаслик эвазига ундан пул талаб қилди. Бу ҳақда «Дарё»га вилоят суди судьяси Тўлқин Тўрақулов маълум қилди.

Режага кўра, Мафтуна Исабоева жабрланувчи Аброр Асқаров билан ишқий муносабатга киришиб, юз берган ноодатий жинсий алоқани тасвирга олади. Шундан сўнг Мафтуна видеотасвирни қизи Соҳиба орқали аввал жиноий шериги Камолиддинга, сўнгра Telegram орқали Аброрга жўнатиб, ушбу тасвирларни танишлари, яқин қариндошлари ва интернет орқали тарқатиб юбормоқчилигини билдирган. Видеони тарқатмаслик эвазига шарти борлигини айтиб, 150 минг доллар сўраган.

Аброр Асқаровнинг аризасига асосан, Фарғона вилоят Ички ишлар бошқармаси Жиноят қидирув бошқармаси ходимлари томонидан ўтказилган тезкор тадбир давомида Камолиддин Шарофиддинов Қўқон шаҳрининг Туркистон кўчасида жойлашган савдо дўкони олдида аризачидан талаб қилинган пулларнинг бир қисми, яъни 20 минг долларни олган вақтида ушланган.

«Камолиддинни 2016 йилдан, Аброрни эса 2013 йилдан буён танийман. 2020 йилнинг январь ойи бошларида Аброр билан кўришдим. Шунда унга бирга бўлишни таклиф қилдим, у эса рози бўлди. Иккаламиз шаҳардаги уй меҳмонхоналаридан бирига бордик. Ўша пайтда сумкамда ишхонамдаги қизларнинг ишини кузатиш учун ўрнатилган яширин камера ишлаб турганлиги сабабли ўртамиздаги ҳолат тасвирга олиниб, сақланиб қолган экан. Сўнгра Тошкентга бордим. Шунда Камолиддин сумкамда бўлган флешкани кўриб, ундаги тасвирларни ўзига кўчириб олган экан. Камолиддин аввалига қарзимни қайтаришимни, бўлмаса, видеони тарқатиб юборишини айтиб қўрқитди. Унга пулим йўқлигини, бу ишларни нима сабабдан қилаётганлигини, шахсий ҳаётимга аралашмаслигини айтдим. У эса Аброр яхши инсон эмаслигини, шу сабабдан ушбу ишларни қилаётганлигини билдирди. Унинг жавобгарлиги борлигини айтиб, огоҳлантирсам ҳам барибир ўз билганидан қолмади. Бўлиб ўтган ишлардан пушаймонман», — дейди Мафтуна Исабоева.

Суд ҳукми билан судланувчилар Камолиддин Шарофиддинов, Мафтуна Исабоева ҳамда Соҳиба Абдураҳмонова Жиноят кодексининг 165-моддаси 3-қисми «а» банди (жуда кўп миқдорда товламачилик) билан айбли деб топилиб, Камолиддин Шарофиддиновга нисбатан 7 йил 6 ой, Мафтуна Исабоевага эса 5 йил озодликдан маҳрум қилиш жазоси тайинланган. Соҳиба Абдураҳмоновага эса 4 йил озодликни чеклаш жазоси тайинлаш билан бирга бир қатор қўшимча тақиқлар юкланган.