Farg‘onada o‘zi bilan ishqiy munosabatda bo‘lgan erkak videosini tarqatmaslik evaziga undan 150 ming dollar talab qilgan ayol va sheriklariga sud hukmi o‘qildi

Farg‘ona shahrida yashovchi ayol o‘zi bilan ishqiy munosabatda bo‘lgan erkakning videosini ijtimoiy tarmoqlar orqali tarqatmaslik evaziga undan pul talab qildi. Bu haqda “Daryo”ga viloyat sudi sudyasi To‘lqin To‘raqulov ma’lum qildi.

Rejaga ko‘ra, Maftuna Isaboyeva jabrlanuvchi Abror Asqarov bilan ishqiy munosabatga kirishib, yuz bergan noodatiy jinsiy aloqani tasvirga oladi. Shundan so‘ng Maftuna videotasvirni qizi Sohiba orqali avval jinoiy sherigi Kamoliddinga, so‘ngra Telegram orqali Abrorga jo‘natib, ushbu tasvirlarni tanishlari, yaqin qarindoshlari va internet orqali tarqatib yubormoqchiligini bildirgan. Videoni tarqatmaslik evaziga sharti borligini aytib, 150 ming dollar so‘ragan.

Abror Asqarovning arizasiga asosan, Farg‘ona viloyat Ichki ishlar boshqarmasi Jinoyat qidiruv boshqarmasi xodimlari tomonidan o‘tkazilgan tezkor tadbir davomida Kamoliddin Sharofiddinov Qo‘qon shahrining Turkiston ko‘chasida joylashgan savdo do‘koni oldida arizachidan talab qilingan pullarning bir qismi, ya’ni 20 ming dollarni olgan vaqtida ushlangan.

“Kamoliddinni 2016-yildan, Abrorni esa 2013-yildan buyon taniyman. 2020-yilning yanvar oyi boshlarida Abror bilan ko‘rishdim. Shunda unga birga bo‘lishni taklif qildim, u esa rozi bo‘ldi. Ikkalamiz shahardagi uy mehmonxonalaridan biriga bordik. O‘sha paytda sumkamda ishxonamdagi qizlarning ishini kuzatish uchun o‘rnatilgan yashirin kamera ishlab turganligi sababli o‘rtamizdagi holat tasvirga olinib, saqlanib qolgan ekan. So‘ngra Toshkentga bordim. Shunda Kamoliddin sumkamda bo‘lgan fleshkani ko‘rib, undagi tasvirlarni o‘ziga ko‘chirib olgan ekan. Kamoliddin avvaliga qarzimni qaytarishimni, bo‘lmasa, videoni tarqatib yuborishini aytib qo‘rqitdi. Unga pulim yo‘qligini, bu ishlarni nima sababdan qilayotganligini, shaxsiy hayotimga aralashmasligini aytdim. U esa Abror yaxshi inson emasligini, shu sababdan ushbu ishlarni qilayotganligini bildirdi. Uning javobgarligi borligini aytib, ogohlantirsam ham baribir o‘z bilganidan qolmadi. Bo‘lib o‘tgan ishlardan pushaymonman”, — deydi Maftuna Isaboyeva.

Sud hukmi bilan sudlanuvchilar Kamoliddin Sharofiddinov, Maftuna Isaboyeva hamda Sohiba Abdurahmonova Jinoyat kodeksining 165-moddasi 3-qismi “a” bandi (juda ko‘p miqdorda tovlamachilik) bilan aybli deb topilib, Kamoliddin Sharofiddinovga nisbatan 7 yil 6 oy, Maftuna Isaboyevaga esa 5 yil ozodlikdan mahrum qilish jazosi tayinlangan. Sohiba Abdurahmonovaga esa 4 yil ozodlikni cheklash jazosi tayinlash bilan birga bir qator qo‘shimcha taqiqlar yuklangan.