Бухоро вилояти Вобкент туманининг айрим ҳудудларида 20 июль куни кучли шамол кузатилиб, дарахтлар синган, симёғочларга зарар етиб, электр таъминотида узилишлар кузатилган. Туманнинг «Ниёзхўжа» маҳалласи Қорёғди қишлоғида фавқулодда ҳолат кузатилган — 205 киши яшайдиган қишлоқдаги 65 та хонадоннинг 56 тасида электр ҳисоблагичлар ёниб кетган.
Шамол оқибатлари
Қишлоқ аҳолисининг сўзларига кўра, 20 июль куни кузатилган кучли шамолдан сўнг электр таъминотида қисқа туташувлар кўпайиб, охир-оқибат ўнлаб хонадонлардаги электр ҳисоблагичлар ёниб кетган. Электр ҳисоблагичларнинг ёниши портлаши оқибатида бир қатор уйларнинг том қисми ҳам ёнган («Ниёзхўжа» маҳалла фуқаролар йиғини раиси ўринбосари Азиза Нўкарованинг аниқлик киритишича, ҳодиса оқибатида бешта хонадон жиддий зарар кўрган).
Аҳоли қисқа туташувлар ва электр ҳисоблагичларнинг портлаши сабаб телевизорлари ишдан чиқиб, холодилник ва кондиционерлари куйганини маълум қилган. Хусусан, фуқаролардан бири унинг электр ҳисоблагичи ёниб кетмаган бўлса-да, бўлиб тўлаш шарти билан сотиб олган маиший техникаси ишдан чиққанини айтиб шикоят қилган (бироқ Қорёғдида бўлган «Дарё» мухбири «техникам куйди» деган фуқароларнинг кўрсатилган воситалари муаммосиз ишлаётганига гувоҳ бўлган).
Шамол вақти хонадонларнинг бирида ток уриши оқибатида сигир ўлган. «Шамолдан гангиб қолдик. Шу вақт молхонамиздаги соғин сигиримиз ваҳимали бўкирди. Билсак, электр симлари узилиб, молхонамиздан ўтган газ қувурига келиб урилган ва кейин сигиримизнинг устига тушган. Ота-онам пул йиғиб, яқинда 10 миллион сўмга сотиб олган сигир эди, ҳалоллай олмадик», — дейди сигири ўлган хонадон вакили 17 ёшли Диёр.
Бир кичик қишлоқда бундай кўламдаги фавқулодда вазиятнинг юзага келишига асосий сабаблардан бири — қишлоқ электр ўтказувчи симёғочнинг ноқонуний ўрнатилгани, камига жойидан пала-партиш кўчирилганидир (эътиборга молик яна бир жиҳат — шу қишлоқда 18 йилдан бери яшовчи Санобар Ҳакимованинг таъкидлашича, у унинг ҳовлиси ўртасида электр симёғоч бор). «Қишлоқ ток етказиб берувчи асосий симёғоч ўзгартирилмас экан, аҳоли жиддий зиён кўраверади», — дейди қорёғдиликлар.
Расмийлар эътибори
Расмийлар шамолдан зарар кўрган қишлоққа табиий офатнинг эртасига етиб келган. «Қишлоқда 40 га яқин симёғоч бор, кучли шамол айримларининг симларини бир-бирига ўралаштириб ташлаган. Ўша куниёқ симлар ажратилди, 56 та хонадондаги электр ҳисоблагичлар ишлатишга яроқли, аммо эски намунадагиларига вақтинча алмаштирилди. Янгиси келиши билан, яна алмаштириб берилади», — деди туман электр тармоқлари корхонаси раҳбари Жасур Тўраев; дарвоқе, унинг таъкидлашича, ўртасида симёғочи бор 18 йиллик ҳовли «ноқонуний қурилган бўлиши мумкин».
Қўшимча қилишларича, Вобкент тумани Давлат солиқ инспекцияси бошлиғи Отабек Муқимов (Қорёғди қишлоғи айнан у раҳбарлик қилаётган секторга киради) ток уриши оқибатида сигири ўлган фуқаро Д.Ҳ.нинг оиласига бир бош қорамол олиб келиб берган. Бундан ташқари, Вобкент тумани ҳокими Фарҳод Умаров ҳам қорёғдиликлар билан учрашган, табиий офат оқибатида ҳақиқатан ҳам зиён кўрган хонадонларга кўмак берилишини билдирган.
«Халқимиз баҳамжиҳат бўлиб, бундай синовларни кўп енгиб ўтган. Бу сафар ҳам зарур чора-тадбирлар кўрилиб, талофат оқибатлари тезда бартараф этилади», — дея маълум қилган туман ҳокими. Қайд этиш жоиз, 2020 йили Бухоро вилоятининг Олот ва Қоракўл туманлари кучли шамолдан жиддий зарар кўрган, аҳоли тинчлиги бузилган эди.
Изоҳ (0)