Президент Шавкат Мирзиёев 2021 йил февралида Наманганга ташрифи чоғида вилоятдаги 26-меҳрибонлик уйида бўлиб, бу ерда тарбияланувчилар учун «барча шароитларни муҳайё қилиш» бўйича кўрсатма берганди. Қайтадан мукаммал таъмирланган муассаса 12 август куни фойдаланишга топширилди, дея хабар бермоқда «Дарё» мухбири Азизбек Абдувалиев.
Меҳрибонлик уйидаги қурилиш-таъмирлаш ишларига 8 миллиард сўм сарфланган — ҳудуддаги 6,5 минг квадрат метрдан зиёд йўл асфальтланган, барча майдонлар ободонлаштирилган, бинолар, хусусан, 76 тарбияланувчига мўжалланган ётоқхона, ўқув хоналари, 10 турдаги тўгарак хоналари, 80 ўринли ошхона, ёпиқ бассейн, спорт зали таъмирланган, очиқ спорт ва ўйин майдончалари янгидан қурилиб, ўқув-техника воситалари ва жиҳозлар ўрнатилган.
Меҳрибонлик уйининг қайтадан очилишига бағишланган тантанали маросимда муассасага Президент совғаси — Nexia-3 автомобили ҳам тоширилган.
Маълумот учун, ушбу меҳрибонлик уйи 2004 йилда ташкил топган бўлиб, ҳозирда бу ерда 40 нафар тарбияланувчи бор. Қайд этиш жоиз, Шавкат Мирзиёевнинг ташрифидан сўнг бир қатор тарбияланувчиларни, хусусан, Президент кўтарган қизалоқни ота-оналари олиб кетган эди.
Изоҳ (0)