Volkswagen корхонаси ҳудудидаги ошхона 2025 йилдан бошлаб ўзининг карривурст номли сосискаларини сотишдан воз кечиб, вегетарианча менюга ўтади. Биринчи бўлиб Вольфсбургдаги ошхона август охирига бориб гўштли таомларни сабзавотли ликопчалар ва бақлажонли бургерларга алмаштиради. Таъкидланишича, сўнгги бир неча йилдан буён айнан сосискалар Volkswagen’нинг энг талабгир маҳсулоти ҳисобланади, деб хабар беради Motor.
Ҳозирча бу каби тақиқ фақатгина компаниянинг штаб-квартирасида жойлашган ошхонага тааллуқли. Марка бош директори ушбу масалани Volkswagen бош ошпази билан муҳокама қилган ва улар вегетарианча егулик фойдасига қарор қабул қилган.
Умуман олганда, карривурст (кетчуп ёки томат пастаси базасидаги махсус соусда қовурилган сарделка) менюдан бутунлай йўқолиб кетмайди. Раҳбариятнинг мақсади ходимларнинг саломатлигини таъминлаш — компания гўштли маҳсулотлар ҳажмини камайтириб, сабзавотлардан тайёрланадиган овқатлар сонини ошириш ниятида.
Шу билан бирга, компания ходимлари бу каби ўзгаришларга шубҳа билан қарамоқда. Яқинда Вольфсбургдаги Golf моделини йиғиш билан шуғулланадиган линия ходимларига тушликка карривурст бериш тўхтатилган ва улар жамоавий шикоят билан касаба уюшмасига мурожаат қилган. Шундан сўнг, сосискалар яна менюга қайтарилган.
Немис автомобилсозлик компанияси 1973 йилдан буён Вольфсбургдаги заводда карривурст ишлаб чиқариб келади. Компания кунига 18 минг донадан ортиқ сосиска чиқаради ва уларнинг эҳтиёт қисмлар каталогида ўз рақами ҳам бор, ҳар бир қадоққа VW original Part маркировкаси қўйилади.
Изоҳ (0)