Электромобиллар 19 йилдан сўнг жаҳон бозорининг учдан икки қисмини эгаллайди — экспертлар

Bloomberg экспертларининг ҳисоблашича, электрокарлар бозорида кейинги 19 йил давомида кескин ўсиш кузатилади. Уларнинг прогнозларига кўра, 2040 йилга бориб улар ички ёнув двигателига эга автомобилларни сиқиб чиқариб, жаҳон автомобиль бозорининг камида учдан икки қисмини эгаллайди. Рақамларда ифодаланадиган бўлса, «яшил» автомобиллар савдоси йилига 66 миллион донага етади, деб хабар беради Motor.

Экспертларнинг фикрича, электрокарлар ва гибридлар ҳозирга келиб ички ёнув двигателига эга автомобилларга рақобат кўрсатмоқда ва борган сари уларнинг устунлиги ортиб боради. Хусусан, 2030 йилдан бошлаб бензин-электр энергиясида ҳаракатланувчи машиналар ҳам қисқариб, «тоза» электрокар ва ёқилғи элементларидаги автомобилларга ўз ўрнини бўшатиб беради.

Прогнозларга кўра, дунёда электрокарлар савдоси бўйича Хитой етакчига айланади — сотувга чиқариладиган барча машиналарнинг учдан бир қисми ушбу мамлакат ҳисобига тўғри келади. Иккинчи ўриндан ҳозирдан бошлаб радикал ўзгаришларга тайёргарлик кўраётган Европа давлатлари ўрин олади: 2035 йилдан бошлаб Европа Иттифоқининг 27 та мамлакатида ёқилғили машиналар, жумладан, гибридлардан фойдаланиш тақиқланади. Учинчи ўринни эса АҚШ эгаллайди.

Бунга электромобилларнинг янада ривожланиши сабаб қилиб кўрсатилмоқда: бир марта қувватланиш орқали узоқ масофа босиб ўтиши, аккумуляторлар нархининг арзонлашуви, қувватлантириш станциялари сонининг ортиши, шунингдек, ҳукуматлар томонидан турли субсидия ва имтиёзларнинг тақдим этилиши.

Замонавий электрокарларда фойдаланилаётган литий-ионли батареяларни ишлаб чиқариш борасидаги етакчилик Хитойга тегишли ва унга етиб олиш осон бўлмайди. Ҳар йили мамлакатда умумий сиғими 479 гигаватт-соатга тенг аккумуляторлар тайёрланади ва ишлаб чиқариш майдончалари тобора ортмоқда. Таққослаш учун, Европада ушбу кўрсаткич 39 гигаватт-соатни ташкил этади, 2025 йилга бориб ушбу мамлакатлар ҳукуматларининг режасига кўра, 400 гигаватт-соатга етиши керак.