Интернетда омади келмасдан, тор кўчага тиқилиб қолган Ferrari Roma суперкарининг видеоси тарқалди. Таъкидланишича, кўнгилсиз ҳодиса Италияда содир бўлган, аммо айнан қайси шаҳарда эканлиги номаълум, деб хабар беради Motor.
Италиянинг тор кўчалари бўйлаб ҳаракатланишга қарор қилган ҳайдовчи ўлчамлари у қадар кичик бўлмаган автомобилининг ҳисобини тўғри ололмади. Roma’нинг узунлиги 4656 миллиметрни, эни эса 1974 миллиметрни ташкил этади: яъни икки эшикли машина иккала ўлчами борасида ҳам Toyota RAV4 каби.
Кадрлардан кўриш мумкинки, номаълум эркак тиқилиб қолган ҳайдовчига ёрдам беришга уринган. Шундан сўнг воқеа жойига бир аёл югуриб келиб, қўллари билан имо-ишора қилишга киришган: афтидан, у машина бошқа ҳаракатлана олмаслигини кўрсатишга уринган. Вазият қандай қилиб бартараф этилгани номаълум, аммо Roma’нинг камида бўёқлари тирналгани аниқ.
2019 йилда тақдим этилган Ferrari Roma модели Портофино платформасида йиғилган. Италия пойтахти шарафига номланган купе 620 от кучи ва 760 Нм айланувчи моментни тақдим этишга қодир 3,9 литли V8 двигатели ёрдамида ҳаракатга келади. Агрегат ўз навбатида саккиз поғонали робот узатмалар қутиси ёрдамида бошқарилади. Купе соатига 100 километр тезликка 3,4 сонияда эришади, максимал тезлиги — 320 километр/соат.
Аввалроқ АҚШда эстакадага урилган юк машинаси уни деярли 2 метрга силжитиб юборгани тўғрисида хабар берилганди.
Изоҳ (0)