«ПСЖ» ҳужумчи Лионель Месси билан келишув имзоланганини эълон қилди.
Томонлар бир йилга узайтириш банди билан икки йиллик шартнома имзолаган. Аввалроқ Месси янги жамоасида йилига 35 миллион евро маош олиши хабар қилинганди.
Месси парижликлар сафида 30-рақам остида ҳаракат қилади.
Месси «ПСЖ»га эркин агент мақомида келиб қўшилди. Аргентиналик футболчи «Барселона» билан шартномани узайтирмади.
«ПСЖ»да бошланажак ҳаётимдаги янги босқични интиқлик билан кутяпман. Клуб ва унинг қарашлари менинг мақсадларимга тўлиқ мос тушади. Бу ердаги ўйинчилар ва ходимлар нақадар иқтидорли эканини биламан. «Парк де Пренс»да майдонга тушишни интиқлик билан кутяпман.Лионель Месси, футболчи
Лионель Месси «Барселона» тарбияланувчиси ҳисобланади. У 2000 йилдан бери клуб тизимида ҳаракат қилиб келар, 2003 йилдан эса асосий жамоада ўйнарди. У каталон клуби билан Испания чемпионати (10), Испания Кубоги ва Суперкубоги (7 тадан), Чемпионлар Лигаси (4), Европа Суперкубоги ва клублар ўртасидаги Жаҳон Чемпионати (3 мартадан) бош совринларини қўлга киритган.
Месси фаолияти давомида «Барселона»дан бошқа жамоада ўйнамаган. У «кўк-анорранглилар» сафида умумий ҳисобда 778 та ўйин ўтказиб, 672 та гол ва 305 та голли узатмани амалга оширган. Унинг жамоа билан қўлга киритган совринлари сони эса 35 тани ташкил қилади.
Изоҳ (0)