Токио шаҳрида ўтган тўрт (беш) йилликнинг энг нуфузли мусобақаси ортда қолди. Унда иштирок этган ўзбекистонлик спортчилар ватанга 5 та медал билан қайтди. Олимпиадада совриндор бўлиш инсонга қандай бахт ва қувонч олиб келиши ҳақидаги ҳар қандай изоҳ ортиқча бўлиши мумкин. Лекин спортчиларнинг ушбу ютуғида уларнинг ўзидан-да кўпроқ суюнадиган одамлар ҳам бор. Ҳа, шубҳасиз, бу уларнинг ота-оналаридир. «Дарё» Токио Олимпиадаси совриндорларининг оналарини суҳбатга тортиб, уларнинг ғалабадан кейинги ички кечинмалари ва қувончи билан қизиқди.
Авваламбор, ҳаммага ассалому алайкум. Давлатжон Олимпиадада бронза медалини қўлга киритди, биз бундан жуда хурсанд бўлдик. Ўғлимни қўллаб-қувватлаб турган ўзбек халқига раҳмат. Ҳамма-ҳаммага раҳмат айтмоқчиман. Биз бундан жудаям қувондик. Аммо биз олтин медал кутгандик. Лекин майли, Худога беҳисоб шукр, у медалсиз қайтмади. Давлатжон Токиода туриб, Парижда олтин олишга ваъда берди. Насиб этса, мақсадига эришади. Ўғлимнинг курашларини кўра олмайман, бу жуда оғир. Жанглар тугагандан кейин ҳаяжонимни босиб, ёзиб олинганини кўраман. Бу йил Давлатжон учун жуда омадли бўлди, Осиё чемпиони бўлди, Жаҳон чемпионатида кумуш медал олди, Олимпиадада бронза медалини қўлга киритди.Нурия Бобонова, Давлат Бобоновнинг онаси
Ўғлим 6 ёшидан бери таэквондо билан шуғулланади. 19 ёшида Олимпия чемпиони бўлди. Бахтимнинг чеки йўқ. 13 йил давомида қилинган меҳнат ўз самарасини берди, бунинг ортида катта машаққат ва ҳаракатлар ётибди. Шундай вазиятлар бўладики, ҳаммасидан воз кечгинг келади, бироқ ўғлим жуда қатъиятли йигит, у таслим бўлмади ва орзусига эришди. Улуғбек бу йўлда кун-у тун меҳнат қилди. Мана, натижа ҳам шунга яраша бўлди. Мен барча ота-оналардан фарзандларини спортга, айниқса, таэквондога беришларини сўраган бўлардим. Агар хоҳиш бўлса ва меҳнат қилинса, 19 ёшда ҳам Олимпиада чемпиони бўлиш мумкинлиги исботланди. Мен бу ерда (аэропортда — «Дарё») ўтирибман-у, лекин ҳамон ўғлимнинг чемпион бўлганига ишонолмаяпман. Бу тушунтириб бўлмас даражада катта қувонч.Улуғбекнинг футболга ўтиб кетишига бир бахя қолгани ҳақида
Улуғбек машғулотлар билан банд бўларди, унинг тенгқурлари эса кўчада футбол ўйнарди, табиийки, Улуғбекка ҳам бу жараён қизиқ бўлган. Шу тариқа у ўзини футболда ҳам синаб кўрган. Футбол мураббийлари уни олиб қўймоқчи бўлган, бироқ у барибир таэквондога қайтган. Бунда Павел Ханнинг хизматлари жуда катта. Биз ундан миннатдормиз. У бизга оиламиз аъзосидек бўлиб қолган. Павел — жуда ажойиб мураббий.
Оксана Рашидова, Улуғбек Рашидовнинг онаси
Мавзуга доир: Брюс Ли, қийин танлов ва у кутган кун. Ўзбек спортида 19 ёшида тарих ёза олган Улуғбек Рашидов ҳикояси
Ҳозир жудаям қувончдаман, — дея гап бошлайди Баҳодир Жалоловнинг онаси Сабоҳат опа кўз ёшларини артар экан. — Саноқли сониялардан сўнг болам бағримга қайтади, қуруқ қўл билан эмас, Олимпиаданинг олтин медали билан. Ўғлим юзи ёруғ бўлиб қайтяпти, бундан 3 йил аввал у Президентимизга ваъда берган эди, у сўзининг устидан чиқди. Халқимизнинг ишончини оқлади. Бундан хурсандман, ўғлим билан фахрланаман.Бундан беш йил аввал Баҳодир Риодан медалсиз қайтганди. Ўшанда турмуш ўртоғим вафот этган пайтлар эди, азадор кийимларим билан, қариндошларимнинг қистови билан Тошкентга келгандим. «Ўғлинг ўксиниб қолмасин, орқасидан бор», дейишганди. Ўша пайтда мен уни овутиш ўрнига, у менга «сиқилманг она, ҳали ҳаммаси яхши бўлади», деб ваъда берганди. Ўғлим чемпион бўлди, ўғлимнинг орзулари ушалди. Афсуски, дадаси бу кунларни кўрмади, ўғлим дадасининг иссиқ юзини кўрмади.
Бу даражага етишнинг ўзи бўлмади. Қанча меҳнат, қанча соғинч ҳислари. Баҳодирнинг боксчи бўлишини ҳам дадаси хоҳлаганди, ўзи эса футболчи бўлишни хоҳлаган. Улар ёшлигидан бирга ўтириб, бокс жангларини томоша қиларди.
Биласизми, шундай пайтлар бўлганки, менга «бўлди, келинойи, болангизни олиб кетинг, ундан боксчи чиқмайди. Уни туманингиздаги мактабда ўқитинг», дейишган. Аммо Тўлқин Қиличев ва Рустам Саидов уни олиб қолган.
Интернетда ўқидим, Баҳодир 2018 йилдан бери ютқазмаётган экан, роса хурсанд бўлиб кетдим. Рус шарҳловчилари агар осмондан метеорит тушмаса, Баҳодирни тўхтатиб бўлмайди дейишди. Бу она учун катта нарса. Яна ўзимга ўзим боламга кўзим тегмасин ҳам деб қўяман (кулади). Чет элликларни ҳам лол қолдирди, бундай ўғлим борлигидан фахрланаман. Битта бўлса ҳам, ўнта ўғилнинг ўрнини босди. Барча ўзбек оналарига чемпионнинг онаси бўлишни тилайман.
Сабоҳат Жалолова, Баҳодир Жалоловнинг онаси
Мавзуга доир: Танқидлар, 5 йил кутилган ғалаба ва кўз ёшлар. Онасига берган ваъдасининг устидан чиққан Баҳодир Жалолов (фотогалерея)
Укам Бекзод бу ютуқларга эришиш учун жуда кўп қийин йўлларни босиб ўтди. Бунинг тагида жудаям катта меҳнат, машаққат ётибди. Очиғини айтиш керак, ҳамма ҳам бу қийинчиликларга чидай олмайди. Буни спорт билан шуғулланганлар билади. Мана шу ютуқлар билан укамни табриклайман. Келажакда бу бронза олтинга айланади.Рио Олимпиадасида медал олишига озгина етмай қолганди. У шундан кейин ҳам тўхтамади ва барибир медал оламан деб ҳаракат қилди. Беш йил давомида тинимсиз меҳнат қилиб, мана шу натижаларга эришди. Риода медал ололмагандан кейин Бекзод анчагача ўзига келолмай сиқилиб юрди, уйқусизликлар бўлди. Лекин тўхтамади ва охири ниятига етди.
Мадина Кумушова, Бекзод Абдураҳмоновнинг опаси
Акбардан жудаям хурсандман, унга ишонардим. Биз буни бир умр орзу қилганмиз. Унинг ютуқларини кўриб, жуда ғурурландим, у билан фахрланаман. Акбар ҳар доим ўз олдига Олимпиада чемпиони бўламан деб мақсад қўярди. Орзусига етди. Раҳматли отаси ҳам ўғлининг Олимпия чемпиони бўлишини хоҳларди. У шу билан тўхтамоқчи эмас ва олдига яна бир мақсад қўйди: Акбар эндиликда Париж Олимпиадасида ҳам қатнашиб, ғолиб бўлмоқчи. Ўғлим жуда камгап ва камтар, шунинг билан бирга ўзига жуда ишонади.Ҳафиза Жўраева, Акбар Жўраевнинг онаси
Билол Эркин суҳбатлашди
Изоҳ (0)