Ички ишлар вазирлиги матбуот котиби Шоҳрух Ғиёсовга ИИБ ходимлари томонидан олиб кетилгач, вафот этган фуқарони «Худо урган» деб атагани учун интизомий чора кўрилган. Бу ҳақда АОКАда ИИВ расмийлари иштирокида 10 август куни бўлиб ўтган матбуот анжуманида маълум қилинди.
2021 йилнинг июль—август ойларида фуқароларнинг ички ишлар органлари ходимлари томонидан олиб кетилгач, вафот этганига доир бир неча хабар тарқалди. Хусусан, Сурхондарёнинг Денов туманида профилактика инспекторининг икки ёрдамчиси бўлинмага олиб кетилаётган фуқарога куч ишлатгани, оқибатда фуқаро касалхонада вафот этгани, шунингдек, Қорақалпоғистоннинг Тахиатош туманида ИИБ ходимлари томонидан олиб кетилган маст фуқаронинг жони охир-оқибат касалхонада узилгани маълум бўлган эди. Ҳозирда ҳар иккала ҳолат юзасидан тергов-текширув ҳаракатлари олиб борилмоқда.
Мазкур воқеалар ҳақидаги хабарлар тарқалгач, ушбу воқеаларнинг ёритилиши юзасидан Ички ишлар вазирлиги матбуот котиби Шоҳрух Ғиёсовнинг фикрлари ёзилган овозли хабар «Rost24.uz» сайти томонидан эълон қилинди. Унда, жумладан, Тахиатош ва Деновдаги воқеалар юзасидан маълумот берган.
Қорақалпоғистондаги ҳолатда фуқаро пневмониядан ўлиб қолган. У ҳақиқатан ҳам ички ишлар органига олиб келинган. Кўчада ғирт маст-аласт аҳволда ётганида, дастлаб (касалхонага) олиб борилиб, текширтирилган, пешонасида жароҳати бўлган, кейин «раётдел»га олиб келинган. Мазаси бўлмагани учун (яна касалхонага) олиб борилган, ўша ерда ўлиб қолган. Бу ҳолатни прокуратура тўлиқ текширган, ходимда ҳеч қандай айб йўқ ва шу боис жиноят ишини қўзғатиш рад этилган. Ҳозир қайта текшириляпти, чунки онаси «ички ишлар органлари ходимлари урди», деб яна ёзган.ИИВ матбуот котиби Шоҳрух Ғиёсовнинг «Rost24.uz» сайти томонидан эълон қилинган овозли хабаридан кўчирма
Мавзуга доир: «Чироқчи воқеаси» бўйича яна 2 нафар ИИБ ходими 3 йил муддатга озодликдан маҳрум қилингани айтилмоқда
Уйида ҳам ҳеч кимга тинчлик бермаган, ҳар доим жанжал. Ундан олдин қаердадир калтак еган, бориб ходимлар олиб келган. Йўлда ҳам қаршилик кўрсатган, қаршилик кўрсатганидан кейин нима қилсин бизникилар? Куч ишлатади-да. Кейин уни қўйиб юборишган. Худо билади қаерда юрган, нима бўлган. Ҳақиқатан ҳам жароҳатлардан ўлган, лекин қаерда жароҳат олган, нима қилган? Ўлишидан олдин касалхонага олиб кетилаётганида «мени милиция урди», деган. Шунинг учун ҳозир, мана, икки нафар ёш бола — бири 1997 йилда, иккинчиси 2003 йилда туғилган — профилактика инспектори ёрдамчилари жувонмарг бўлиб кетди, битта Худо урганнинг орқасидан.Шоҳрух Ғиёсов овозли хабар давомида юқорида баён қилинган воқеалар ҳақидаги хабарлар «текширилмай» тарқатилганини қоралаган, бу каби ҳолатларга доир ахборотни тарқатишдан аввал ИИВ матбуот хизмати билан боғланиб, вазиятга аниқлик киритиш мақсадга мувофиқлигини тушунтирган. «Бир нарса гапиришдан, ёзишдан олдин тил билан чопманглар, илтимос, озгина суриштириб кўринглар. Менга чиқинглар, сўранглар мендан. Нима ҳолат бўлган у ерда — ўзим тушунтириб бераман. Бу умумий гаплар – сизлар ҳулоса қилишингар учун, бу ҳеч қанақа расмий муносабат эмас», — дея қўшимча қилган Ғиёсов.ИИВ матбуот котиби Шоҳрух Ғиёсовнинг «Rost24.uz» сайти томонидан эълон қилинган овозли хабаридан кўчирма
Мавзуга доир: Андижонда ИИБ ходимларининг қийноғидан сўнг вафот этган фуқаронинг синглиси: «Акам қимматбаҳо тош можароси қурбони бўлди»
Ушбу ҳолат вазиримизнинг шахсан ўзлари ҳузурида муҳокама қилинди. Вазиримиз томонидан Шоҳрух Ғиёсовга нисбатан интизомий чора қўлланилди. Чунки оммавий ахборот воситалари билан мулоқот қилиши керак бўлган масъул раҳбар, албатта, бундай сўзларни ишлатиши керак эмас эди. Яна бир бор қайтараман — бу вазиятни ҳурматли вазиримиз шахсан ўзлари муҳокама қилдилар, — дея маълум қилди Бекмурод Абдуллаев.Бундан аввал Каттақўрғонда ДСИ ходими ЙПХ машинасида вафот этгани ҳақида хабарлар тарқалгани ҳамда Наманган вилоят ИИБ Жиноят-қидирув бошқармасининг икки нафар катта тезкор вакили жиноий жавобгарликка тортилгани ҳақида хабар берилганди.
Изоҳ (0)