Андижон вилоятида фуқароларни олий таълим муассасаларига ўқишга киритиш билан боғлиқ фирибгарлик ҳолатлари аниқланди, деб хабар беради Бош прокуратура ҳузуридаги департамент.
Департамент ҳамда ДХХнинг Қўрғонтепа тумани бўлимлари томонидан тезкор тадбир ўтказилган. Тадбирда Андижон давлат университети катта ўқитувчиси У.Қ. фуқаро М.нинг фарзандини юқори лавозимда ишловчи танишлари орқали Қирғизистондаги университетлардан бирининг Стоматология йўналишига ўқишга киритиб қўйишни ваъда қилгани аниқланган. Бунинг эвазига у 1,4 минг доллар олган вақтида ашёвий далиллар билан ушланган.
Шунингдек, департамент ҳамда ДХХнинг Шаҳрихон тумани бўлимлари томонидан ўтказилган тезкор тадбирда О.Ў. исмли шахс бошқа бир фуқаро Н.ни Андижон қишлоқ хўжалиги ва агротехнологиялар институтига танишлари орқали ўқишга киритиб қўйгани аниқланган. Хизмати эвазига у 1,1 минг долларни фирибгарлик йўли билан олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Андижон ва Хоразмда пул эвазига абитуриентларни ўқишга киритиб қўйишни ваъда қилган институт ҳисобчиси ва талаба ушлангани, Андижонда фуқаронинг ўқишини 1500 доллар эвазига Ўшдан Наманганга кўчириб беришни ваъда қилган талаба қўлга олингани тўғрисида хабар берилганди. Шунингдек, Самарқанд ва Қашқадарёда пул эвазига ўқишга киритиб қўйишни ваъда қилган шахслар ушлангани, Сурхондарё ва Фарғонада фуқароларни ўқишга киритиб қўйиш эвазига пул сўраган талабалар қўлга тушганди.
Изоҳ (0)