Олмалиқда ЙПХ ходимини ҳақорат қилган ҳайдовчига жиноят иши қўзғатилиши мумкин

Ижтимоий тармоқларда «Олмалиқда ЙПХ ходими ва ҳайдовчи ўртасидаги можаро» сарлавҳаси остидаги видео тарқалди. Ҳолат юзасидан ЙҲХББ маълумот берди.

Қайд этилишича, 2021 йилнинг 8 август куни Тошкент вилояти, Олмалиқ шаҳар ИИБ ЙҲХБ ЙПХ ходими Т.Х. томонидан Олмалиқ шаҳар Мирзо Улуғбек кўчасида Damas русумли автомобиль ҳайдовчиси тўхтатилган.

Текширув давомида ҳайдовчининг ўз муддатида тўланмаган қарздорлиги мавжудлиги маълум бўлган. ЙПХ ходими тушунтириш бериб автомобилни жарима майдонига жойлашини айтган. Ҳайдовчи автомобили жарима майдонига жойланмаслиги учун ўз эътирозларини билдирган. Автомобилда бўлган йўловчи телефон орқали ҳолатни тасвирга олган.

ЙПХ ходими мазкур автомобилни Маъмурий жавобгарлик тўғрисидаги кодекснинг 291-моддасига асосан жарима майдонига жойлаштирган. Ҳайдовчи қарздорликни бартараф қилиб, автомобилини жарима майдонидан олиб чиқиб кетган.

Ўзаро мулоқот жараёнида ҳайдовчи ЙПХ ходими А.I.га нисбатан ҳақоратли сўз ишлатгани учун ходимнинг билдиргиси асосида тегишли ҳужжатлар расмийлаштирилиб, кўриб чиқиш учун жиноят ишлари бўйича Олмалиқ шаҳар судига юбориш чоралари кўрилмоқда.

Бундан аввал Андижонда ЙПХ ходими ҳужжатларини тақдим этишни истамаган ҳайдовчини камаридан тортиб, «отдел»га олиб боришга урингани, Жиззахда ниқобни тўлиқ тақишга мажбур бўлмаган ЙПХ ходимига нисбатан хизмат текшируви тайинлангани ҳамда Тошкентда ҳайдовчини ҳақорат қилган ЙПХ ходимига нисбатан хизмат текшируви тайинлангани ҳақида хабар берилганди.