Ijtimoiy tarmoqlarda Surxondaryo viloyati, Denov tumani, “Oqtom” mahallasida yashagan H.X.ni ichki ishlar xodimlari majburlab idoraga olib ketib, vahshiylarcha qiynab o‘ldirgani haqida xabarlar tarqalgan. Holat yuzasidan Bosh prokuratura ma’lumot berdi.
Aniqlanishicha, 2021-yilning 10-iyulida Denov tumani “Oqtom” mahallasida yashovchi fuqaro Y.X. tuman ichki ishlar bo‘limiga akasi H.X. mast holda yashash uyida janjal qilib, tinchligini buzayotgani haqida xabar bergan.
Shunga asosan, tuman IIO FMB profilaktika inspektori va uning ikki nafar yordamchisi H.X.ning xonadoniga kelgan va uni avtomashinaga o‘tkazib, tuman IIBga olib ketgan. Yo‘lda profilaktika inspektorining yordamchilari H.X.ni bir necha bor urib tan jarohati yetkazgan.
Oqibatda H.X. 11-iyul kuni shifoxonada vafot etgan.
Mazkur holat yuzasidan Denov tuman prokuraturasi tomonidan Jinoyat kodeksining 104 (qasddan badanga og‘ir shikast yetkazish) va 206-moddasi (hokimiyat yoki mansab vakolati doirasidan chetga chiqish) bilan jinoyat ishi qo‘zg‘atilgan.
Jinoyat ishi doirasida 2 nafar shaxsga nisbatan qamoqqa olish ehtiyot chorasi qo‘llanilgan. Surxondaryo viloyat prokuraturasi tomonidan tergov harakatlari olib borilmoqda.
Bundan avval Kattaqo‘rg‘onda DSI xodimi YPX mashinasida vafot etgani haqida xabarlar tarqalgani hamda Namangan viloyat IIB Jinoyat-qidiruv boshqarmasining ikki nafar katta tezkor vakili jinoiy javobgarlikka tortilgani haqida xabar berilgandi.
