5 август куни «Ўзбекистон республика товар-хом ашё биржаси» АЖ ва Ахборот технологиялари ва коммуникацияларини ривожлантириш вазирлиги ўртасида қисқа рақамлардан (4 рақамли) фойдаланиш бўйича шартнома тузиш ҳуқуқини берувчи электрон аукцион ўтказиш бўйича шартнома тузилди. Бу ҳақда биржа матбуот хизмати хабар берди.
Мазкур келишувдан кўзланган асосий мақсад маълумот хизматлари учун қисқа (4 рақамли) махсус рақамларни онлайн-аукцион тарзда сотиш орқали улардан фойдаланиш имкониятларини кенгайтиришдан иборатдир.
Ҳамкорлик доирасида қисқа рақамлар биржанинг «Mobilraqam.uzex.uz» платформасида онлайн аукцион тарзида сотила бошланган.
Онлайн-аукционларда фақат юридик шахслар иштирок этишлари мумкин бўлади. Бунинг учун ушбу веб-сайтда онлайн рўйхатдан ўтиш ва биржанинг ҳисоб-китоб клиринг палатаси (ҲКП)га «закалат» ва воситачилик йиғими учун керакли маблағларни киритишлари керак.
Айни вақтда бу каби рақамларнинг бошланғич нархи 9-120 миллион сўмни ташкил этмоқда. Онлайн савдода иштирок этиш тартиби билан сайтга жойлаштирилган видео йўриқнома орқали танишиб чиқиш мумкин.
Аввалроқ Ўзбекистон товар-хом ашё биржасида «чиройли» мобил рақамлар савдоси беш баробарга ошгани маълум бўлганди. Ҳозирда биржада тўртта оператор — Beeline, Ucell, Mobiuz ва Uztelecom рақамларини харид қилиш мумкин.
Изоҳ (0)