Ichki ishlar vazirligi matbuot kotibi Shohrux G‘iyosovga IIB xodimlari tomonidan olib ketilgach, vafot etgan fuqaroni “Xudo urgan” deb atagani uchun intizomiy chora ko‘rilgan. Bu haqda AOKAda IIV rasmiylari ishtirokida 10-avgust kuni bo‘lib o‘tgan matbuot anjumanida ma’lum qilindi.
2021-yilning iyul—avgust oylarida fuqarolarning ichki ishlar organlari xodimlari tomonidan olib ketilgach, vafot etganiga doir bir necha xabar tarqaldi. Xususan, Surxondaryoning Denov tumanida profilaktika inspektorining ikki yordamchisi bo‘linmaga olib ketilayotgan fuqaroga kuch ishlatgani, oqibatda fuqaro kasalxonada vafot etgani, shuningdek, Qoraqalpog‘istonning Taxiatosh tumanida IIB xodimlari tomonidan olib ketilgan mast fuqaroning joni oxir-oqibat kasalxonada uzilgani ma’lum bo‘lgan edi. Hozirda har ikkala holat yuzasidan tergov-tekshiruv harakatlari olib borilmoqda.
Mazkur voqealar haqidagi xabarlar tarqalgach, ushbu voqealarning yoritilishi yuzasidan Ichki ishlar vazirligi matbuot kotibi Shohrux G‘iyosovning fikrlari yozilgan ovozli xabar “Rost24.uz” sayti tomonidan e’lon qilindi. Unda, jumladan, Taxiatosh va Denovdagi voqealar yuzasidan ma’lumot bergan.
Qoraqalpog‘istondagi holatda fuqaro pnevmoniyadan o‘lib qolgan. U haqiqatan ham ichki ishlar organiga olib kelingan. Ko‘chada g‘irt mast-alast ahvolda yotganida, dastlab (kasalxonaga) olib borilib, tekshirtirilgan, peshonasida jarohati bo‘lgan, keyin “rayotdel”ga olib kelingan. Mazasi bo‘lmagani uchun (yana kasalxonaga) olib borilgan, o‘sha yerda o‘lib qolgan. Bu holatni prokuratura to‘liq tekshirgan, xodimda hech qanday ayb yo‘q va shu bois jinoyat ishini qo‘zg‘atish rad etilgan. Hozir qayta tekshirilyapti, chunki onasi “ichki ishlar organlari xodimlari urdi”, deb yana yozgan.IIV matbuot kotibi Shohrux G‘iyosovning “Rost24.uz” sayti tomonidan e’lon qilingan ovozli xabaridan ko‘chirma
Mavzuga doir: “Chiroqchi voqeasi” bo‘yicha yana 2 nafar IIB xodimi 3 yil muddatga ozodlikdan mahrum qilingani aytilmoqda
Uyida ham hech kimga tinchlik bermagan, har doim janjal. Undan oldin qayerdadir kaltak yegan, borib xodimlar olib kelgan. Yo‘lda ham qarshilik ko‘rsatgan, qarshilik ko‘rsatganidan keyin nima qilsin biznikilar? Kuch ishlatadi-da. Keyin uni qo‘yib yuborishgan. Xudo biladi qayerda yurgan, nima bo‘lgan. Haqiqatan ham jarohatlardan o‘lgan, lekin qayerda jarohat olgan, nima qilgan? O‘lishidan oldin kasalxonaga olib ketilayotganida “meni militsiya urdi”, degan. Shuning uchun hozir, mana, ikki nafar yosh bola — biri 1997-yilda, ikkinchisi 2003-yilda tug‘ilgan — profilaktika inspektori yordamchilari juvonmarg bo‘lib ketdi, bitta Xudo urganning orqasidan.Shohrux G‘iyosov ovozli xabar davomida yuqorida bayon qilingan voqealar haqidagi xabarlar “tekshirilmay” tarqatilganini qoralagan, bu kabi holatlarga doir axborotni tarqatishdan avval IIV matbuot xizmati bilan bog‘lanib, vaziyatga aniqlik kiritish maqsadga muvofiqligini tushuntirgan. “Bir narsa gapirishdan, yozishdan oldin til bilan chopmanglar, iltimos, ozgina surishtirib ko‘ringlar. Menga chiqinglar, so‘ranglar mendan. Nima holat bo‘lgan u yerda — o‘zim tushuntirib beraman. Bu umumiy gaplar – sizlar hulosa qilishingar uchun, bu hech qanaqa rasmiy munosabat emas”, — deya qo‘shimcha qilgan G‘iyosov.IIV matbuot kotibi Shohrux G‘iyosovning “Rost24.uz” sayti tomonidan e’lon qilingan ovozli xabaridan ko‘chirma
Mavzuga doir: Andijonda IIB xodimlarining qiynog‘idan so‘ng vafot etgan fuqaroning singlisi: “Akam qimmatbaho tosh mojarosi qurboni bo‘ldi”
Ushbu holat vazirimizning shaxsan o‘zlari huzurida muhokama qilindi. Vazirimiz tomonidan Shohrux G‘iyosovga nisbatan intizomiy chora qo‘llanildi. Chunki ommaviy axborot vositalari bilan muloqot qilishi kerak bo‘lgan mas’ul rahbar, albatta, bunday so‘zlarni ishlatishi kerak emas edi. Yana bir bor qaytaraman — bu vaziyatni hurmatli vazirimiz shaxsan o‘zlari muhokama qildilar, — deya ma’lum qildi Bekmurod Abdullayev.Bundan avval Kattaqo‘rg‘onda DSI xodimi YPX mashinasida vafot etgani haqida xabarlar tarqalgani hamda Namangan viloyat IIB Jinoyat-qidiruv boshqarmasining ikki nafar katta tezkor vakili jinoiy javobgarlikka tortilgani haqida xabar berilgandi.
Izoh (0)