Жиззахда тадбиркорларга катта миқдорда нореал қарздорлик ҳисоблаган «Ҳудудгаз Жиззах» ходимларига чора кўрилди, дея хабар бермоқда Бизнес-омбудсман матбуот хизмати.
Қайд этилишича, Жиззах вилоятида фаолият кўрсатувчи бир гуруҳ тадбиркорлик субъектлари уларга нисбатан ноқонуний равишда қарздорлик ҳисоблангани ва улар асоссиз газ тармоғидан узилганидан норози бўлиб, Бизнес-омбудсманга мурожаат қилган.
Аниқланишича, «Ҳудудгаз Жиззах» ходимлари томонидан табиий газ сарфини ҳисобга олувчи Fossa дастурига юқоридаги тадбиркорлик субъектларининг ҳисобига қарийб 903 миллион сўмлик нореал қарздорлик киритилган.
Ушбу ҳолат юзасидан бизнес-омбудсман томонидан «Ҳудудгаз Жиззах» газ таъминоти филиали мансабдор шахслари ва бошқаларнинг ҳаракатларига қонуний баҳо бериш ва уларга нисбатан жиноий иш қўзғатиш таклифи вилоят прокуратурасига юборилди.
Бизнес-омбудсманнинг таклифи бўйича терговга қадар текширув ҳаракатлари амалга оширилиб, натижада «Ҳудудгаз Жиззах» газ таъминоти филиали, «Ҳудудгаз Метрология» филиали Жиззах бўлими мансабдор шахслари ва бошқаларга нисбатан Жиноят кодексининг 205-моддаси 2-қисми (жуда кўп миқдорда зарар етказган ҳолда ҳокимият ёки мансаб ваколатини суиистеъмол қилиш) ва 209-моддаси 1-қисми (мансаб сохтакорлиги) билан жиноят иши қўзғатилди.
Ҳозирда жиноят иши бўйича дастлабки тергов ҳаракатлари олиб борилмоқда.
Бундан аввал Тошкентда МИБ ходими икки йилда 596 млн сўмни ўзлаштириб юборгани маълум бўлгани, Тошкент вилояти Жисмоний тарбия ва спорт бошқармаси собиқ раҳбари қамоққа олингани ҳамда Жиззах вилояти ҳокимининг собиқ ўринбосари Акрам Раҳмонқулов ва унинг 10 нафар жиноий шериклари қамоққа олингани маълум қилингани ҳақида хабар берилганди.
Изоҳ (0)