Наманган шаҳрида машина ювиш шохобчасидаги Malibu ўғирлаб кетилди, дея хабар қилмоқда Тергов департаменти матбуот хизмати.
Қайд этилишича, 2021 йилнинг 2 август куни соат 14:30 ларда Наманган шаҳрида жойлашган автомобиллар ювиш шохобчасида ишчи бўлиб ишловчи 18 ёшли О.А. ювиш учун қолдириб кетилган 25 ёшли А.А.га тегишли бўлган Malibu русумли автомашинани аввалига ювиб, сўнгра номаълум томонга бошқариб кетган.
Мазкур ҳолат юзасидан Наманган шаҳри бўйича ИИО ФМБ ҳузуридаги тергов бўлими томонидан О.А.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.
Олиб борилган тергов-тезкор ҳаракатлари натижасида Malibu русумли автомашина Давлатобод тумани «Порлоқ» маҳалласи ҳудудидан техник соз ҳолда топилган.
Ҳозирда О.А.ни ушлаш чоралари кўрилмоқда.
Бундан аввал Бухорода маст фуқаро танишининг Spark автомобилини олиб қочгани, Андижонда олиб қочилган Spark иккита автомобилга бориб урилгани ҳамда Фарғонада собиқ куёв қайнонасининг машинасини олиб қочгани ҳақида хабар берилганди.
Изоҳ (0)