Қарши шаҳридаги марказий кўчаларнинг бирида MAN юк машинаси ва Nexia-3 иштирокида ЙТҲ содир бўлди. Бу ҳақда «Дарё»га Қарши шаҳар ИИБ йўл ҳаракати хавфсизлиги бўлими ахборот хизмати инспектори Аҳрор Усмонов хабар берди.
Маълумот берилишича, мазкур ЙТҲ 2021 йилнинг 2 август куни соат 14:50 да Қарши шаҳридаги Ислом Каримов ҳамда Амир Темур кўчалари кесишган чорраҳада содир бўлган.1997 йил туғилган ҳайдовчи Э.Д. бошқарувида бўлган MAN русумли юк машинаси Амир Темур кўчаси бўйлаб ҳаракатланиб келиб, Ислом Каримов кўчасида ҳаракатини давом эттираётган И.У. бошқарувидаги Nexia-3 билан тўқнашган. Оқибатда Nexia-3 ҳайдовчиси тан жароҳати олиб, шаҳар шифохонасига ётқизилган.
«Мазкур ҳолат бўйича Қарши шаҳар ЙҲХБ ходимлари томонидан терговолди суриштирув ҳаракатлари олиб борилмоқда. Қарши шаҳар ЙҲХБ барча ҳайдовчиларни ҳушёрликка чақириб, светофорнинг тақиқловчи ишораларига ва йўл ҳаракати қоидаларига риоя этишингизни сўраб қолади», — дейди Қарши шаҳар ЙҲХБ ахборот хизмати инспектори Аҳрор Усмонов.
Аввалроқ Жиззахда катта тезликда ҳаракатланган BMW машинаси Nexia’ни йўлдан сиқиб чиқариши оқибатида ЙТҲ содир этилгани, Тошкентда Nexia билан тўқнашиб, ағдарилиб кетган тез ёрдам машинасидаги йўловчи вафот этгани ҳақида хабар берилганди.
Изоҳ (0)