Ўзбекистоннинг барча ҳудудларида 5 август санасидан 2021—2022-ўқув йили учун тест имтиҳонлари бошланди. Давлат тест маркази берган маълумотга кўра, жорий ўқув йили учун 948 минг 211 нафар абитуриент рўйхатдан ўтган. Кириш имтиҳонлари ўтказиладиган стадион ва хиёбонлар рўйхати эълон қилинган.
Ўтган йилгидан фарқли ўлароқ, 2021 йилда ихтисослашган иккита фан бўйича имтиҳон топшириш белгиланган. Кириш имтиҳонлари бешта фан бўйича бўлади, уларнинг учтаси мажбурий — она тили, Ўзбекистон тарихи, математика ва яна иккита фан танланган мутахассислик бўйича. Бешта фандан тестларни ишлашга 3,5 соат вақт ажратилади.
Абитуриентлар имтиҳон топширганининг эртаси куни ўзларининг шахсий кабинетлари орқали тест натижаларини билиши мумкин. Ўқишга кирган ёки кирмагани тўғрисида маълумот бутун республика бўйлаб тест синовлар якунланганидан кейин, бир ҳафта ичида эълон қилинади.
«Дарё» мамлакат бўйлаб бошланган тест имтиҳонларидан фоторепортаж тайёрлади.
Наманган вилояти
Наманган шаҳридаги «Навбаҳор-Умид» стадионида тест синовлари жараёни. Вилоятда бундан ташқари яна иккита Наманган шаҳридаги «Динамо» ва Тўрақўрғон туманидаги Ёшлик стадионларида имтиҳонлар бўлиб ўтмоқда.
Ижтимоий тармоқларда 5 август куни имтиҳонлардаги тест саволлари тарқалиб кетгани юзасидан ДТМ берган изоҳида биология фанидан 1122414 рақамли тест топшириқлари китоби Наманган вилоятида ўтказилган тест синовларига тааллуқли эканини маълум қилди. Таъкидланишича, мазкур абитуриент тест синови вақтида телефондан фойдаланаётгани аниқланиб, далолатнома асосида тест синовларидан четлаштирилган.
Қашқадарё вилояти
Қарши шаҳридаги Насаф марказий стадионида ОТМларга кириш имтиҳони
Бухоро вилояти
Бухоро вилоятида тест синовлари «Бухоро» марказий ўйингоҳи, «Умид» футбол майдони ва «Дилкушо» спорт мажмуасида бўлиб ўтмоқда. Тест синовлари икки сменада ўтказилади. 1-смена эрталаб соат 07:00 да, 2-смена соат 19:00 да бошланиб, 3 соатдан давом этади.
Тест синовларига олий таълим муассасаларининг профессор-ўқитувчилари ва халқ таълим бошқармасининг директор, директор ўринбосарларидан иборат 221 нафар назоратчи жалб этилган.
Андижон вилояти
Тест имтиҳонлари Андижон шаҳридаги спортнинг ўйин турлари ва енгил атлетикага ихтисослаштирилган болалар-ўсмирлар спорт мактаби асосий стадионида ўтказилмоқда.
Самарқанд вилояти
Самарқанд вилояти олий таълим муассасаларига ўқишга қабул қилиш учун тест синовлари «Локомотив» футбол стадиони, Самарқанд шаҳридаги 2-болалар ва ўсмирлар спорт мактаби (БЎСМ) стадиони, Самарқанд шаҳридаги «Нурафшон» футбол стадиони, Самарқанд туманидаги БЎСМ футбол майдони ва Жомбой туманидаги БЎСМ футбол майдонида ўтказилмоқда.
Фарғона вилояти
Имтиҳонлар Фарғона шаҳридаги Фарғона давлат университети стадионида ўтказилмоқда.
Сирдарё вилояти
Гулистон шаҳридаги Марказий ўйингоҳда тест синовлари бошланди. Тест синовлари қоида тариқасида, кунига икки сменада: 1-смена 07:00 дан, 2-смена 19:00 дан бошланиши режалаштирилган.
Тошкент шаҳри
Тошкент шаҳрида ОТМларга кириш имтиҳонлари «Пахтакор» ва «Бунёдкор» стадионлари, шунингдек, «Ғалаба» ва «Ботаника» боғида бўлиб ўтмоқда.
Эслатиб ўтамиз Ўзбекистонда ОТМга киришда энг юқори балл тўплаган 200 нафар абитуриент учун Президент гранти жорий этилган. Шунингдек, 2021/2022-ўқув йилидан бошлаб таълим кредити 7 йил муддатга 14 фоиз ставка билан берилиши ҳақида хабар берилган.
Изоҳ (0)