O‘zbekistonning barcha hududlarida 5-avgust sanasidan 2021—2022-o‘quv yili uchun test imtihonlari boshlandi. Davlat test markazi bergan ma’lumotga ko‘ra, joriy o‘quv yili uchun 948 ming 211 nafar abituriyent ro‘yxatdan o‘tgan. Kirish imtihonlari o‘tkaziladigan stadion va xiyobonlar ro‘yxati e’lon qilingan.
O‘tgan yilgidan farqli o‘laroq, 2021-yilda ixtisoslashgan ikkita fan bo‘yicha imtihon topshirish belgilangan. Kirish imtihonlari beshta fan bo‘yicha bo‘ladi, ularning uchtasi majburiy — ona tili, O‘zbekiston tarixi, matematika va yana ikkita fan tanlangan mutaxassislik bo‘yicha. Beshta fandan testlarni ishlashga 3,5 soat vaqt ajratiladi.
Abituriyentlar imtihon topshirganining ertasi kuni o‘zlarining shaxsiy kabinetlari orqali test natijalarini bilishi mumkin. O‘qishga kirgan yoki kirmagani to‘g‘risida ma’lumot butun respublika bo‘ylab test sinovlar yakunlanganidan keyin, bir hafta ichida e’lon qilinadi.
“Daryo” mamlakat bo‘ylab boshlangan test imtihonlaridan fotoreportaj tayyorladi.
Namangan viloyati
Namangan shahridagi “Navbahor-Umid” stadionida test sinovlari jarayoni. Viloyatda bundan tashqari yana ikkita Namangan shahridagi “Dinamo” va To‘raqo‘rg‘on tumanidagi Yoshlik stadionlarida imtihonlar bo‘lib o‘tmoqda.
Ijtimoiy tarmoqlarda 5-avgust kuni imtihonlardagi test savollari tarqalib ketgani yuzasidan DTM bergan izohida biologiya fanidan 1122414 raqamli test topshiriqlari kitobi Namangan viloyatida o‘tkazilgan test sinovlariga taalluqli ekanini ma’lum qildi. Ta’kidlanishicha, mazkur abituriyent test sinovi vaqtida telefondan foydalanayotgani aniqlanib, dalolatnoma asosida test sinovlaridan chetlashtirilgan.
Qashqadaryo viloyati
Qarshi shahridagi Nasaf markaziy stadionida OTMlarga kirish imtihoni
Buxoro viloyati
Buxoro viloyatida test sinovlari “Buxoro” markaziy o‘yingohi, “Umid” futbol maydoni va “Dilkusho” sport majmuasida bo‘lib o‘tmoqda. Test sinovlari ikki smenada o‘tkaziladi. 1-smena ertalab soat 07:00 da, 2-smena soat 19:00 da boshlanib, 3 soatdan davom etadi.
Test sinovlariga oliy ta’lim muassasalarining professor-o‘qituvchilari va xalq ta’lim boshqarmasining direktor, direktor o‘rinbosarlaridan iborat 221 nafar nazoratchi jalb etilgan.
Andijon viloyati
Test imtihonlari Andijon shahridagi sportning o‘yin turlari va yengil atletikaga ixtisoslashtirilgan bolalar-o‘smirlar sport maktabi asosiy stadionida o‘tkazilmoqda.
Samarqand viloyati
Samarqand viloyati oliy ta’lim muassasalariga o‘qishga qabul qilish uchun test sinovlari “Lokomotiv” futbol stadioni, Samarqand shahridagi 2-bolalar va o‘smirlar sport maktabi (BO‘SM) stadioni, Samarqand shahridagi “Nurafshon” futbol stadioni, Samarqand tumanidagi BO‘SM futbol maydoni va Jomboy tumanidagi BO‘SM futbol maydonida o‘tkazilmoqda.
Farg‘ona viloyati
Imtihonlar Farg‘ona shahridagi Farg‘ona davlat universiteti stadionida o‘tkazilmoqda.
Sirdaryo viloyati
Guliston shahridagi Markaziy o‘yingohda test sinovlari boshlandi. Test sinovlari qoida tariqasida, kuniga ikki smenada: 1-smena 07:00 dan, 2-smena 19:00 dan boshlanishi rejalashtirilgan.
Toshkent shahri
Toshkent shahrida OTMlarga kirish imtihonlari “Paxtakor” va “Bunyodkor” stadionlari, shuningdek, “G‘alaba” va “Botanika” bog‘ida bo‘lib o‘tmoqda.
Eslatib o‘tamiz O‘zbekistonda OTMga kirishda eng yuqori ball to‘plagan 200 nafar abituriyent uchun Prezident granti joriy etilgan. Shuningdek, 2021/2022-o‘quv yilidan boshlab ta’lim krediti 7 yil muddatga 14 foiz stavka bilan berilishi haqida xabar berilgan.
Izoh (0)