Шавкат Мирзиёев Туркманистон президенти Гурбангули Бердимуҳамедов билан учрашув ўтказди

Ўзбекистон Президенти Шавкат Мирзиёев 6 август куни Туркманистон президенти Гурбангули Бердимуҳамедов билан учрашув ўтказди. Бу ҳақда давлат раҳбарининг матбуот хизмати хабар берди.

Учрашувда Ўзбекистон Президенти Туркманистоннинг «Аваза» миллий сайёҳлик зонасида ўтаётган Марказий Осиё давлатлари раҳбарларининг навбатдаги Маслаҳат учрашуви юқори даражада ташкил этилганини, минтақавий ҳамкорликни мустаҳкамлашда бу яна бир муҳим босқич бўлишини таъкидлаган.

Ўзбекистон ва Туркманистон президентлари икки томонлама ҳамкорликнинг долзарб масалаларини, минтақавий ва халқаро даражадаги алоқаларни муҳокама қилган.

Давлат раҳбарлари пандемиянинг қийин даврига қарамай, Ўзбекистон билан Туркманистон ўртасидаги дўстлик, яхши қўшничилик ва стратегик шериклик муносабатлари мустаҳкамланиб бораётганини мамнуният билан қайд этган.

Савдо-иқтисодий алоқаларни ривожлантириш масалаларига алоҳида эътибор қаратилган.

«Учрашувда аввал эришилган келишувларнинг бажарилиш ҳолати кўриб чиқилди. Ижобий ўсиш суръатларни давом эттириш учун янги лойиҳалар ишлаб чиқиш, чегарадош ҳудудлар ва ишбилармонлар ўртасидаги алоқаларни фаоллаштириш кераклиги таъкидланди. Транспорт-логистика инфратузилмасини ривожлантириш, Жанубий Осиё ва Жанубий Кавказ йўлаклари орқали янги ташқи бозорларга чиқиш, шу жумладан, Ашхобод битимига мувофиқ халқаро транспорт ва транзит йўлагини яратиш истиқболлари муҳокама қилинди», — дейилади хабарда.

Мулоқотда бўлажак олий даражадаги учрашувга тайёргарлик масалалари кўриб чиқилган. Ҳамкорликнинг янги «ўсиш нуқталари»ни топиш, самарали лойиҳа ва шартномалар тайёрлаш учун яқин вақтларда Ҳукуматлараро комиссияси ва Ишбилармонлар кенгашининг навбатдаги йиғилишини ўтказишга келишиб олинган.

Маданий-гуманитар алоқаларни кенгайтириш масалаларига ҳам эътибор қаратилган.

«Учрашув якунида Ўзбекистон ва Туркманистон президентлари стратегик шериклик муносабатларини халқларимиз фаровонлиги йўлида ўзаро ишонч ва ҳурмат тамойиллари асосида изчил мустаҳкамлаб бориш борасида қатъий эканликларини таъкидладилар», — дейилади хабарда.

Эслатиб ўтамиз, 5 август куни Ўзбекистон Президенти «Аваза» миллий сайёҳлик зонасида бўлиб ўтадиган Марказий Осиё давлатлари раҳбарларининг навбатдаги Маслаҳат учрашувида иштирок этаиш учун Туркманбошига етиб борганди.