Тожикистоннинг Хатлон вилоятида Ўзбекистон, Тожикистон ва Россиянинг 2,5 мингдан ортиқ ҳарбийлари иштирокида қўшма машғулотлар бошланди. Бу ҳақда Россия Марказий ҳарбий округ матбуот хизматига таяниб «Интерфакс» хабар берди.
Қўшма машғулотларга 500 га яқин қурол ва ҳарбий техника бирлиги (хусусан, Россия томондан 420 донагача) жалб қилинади.
Тожикистон, Ўзбекистон ва Россия қўшинлари иштирокидаги уч томонлама машғулотлар 5 августдан 10 августгача давом этиши тўғрисида хабар берилганди. 2 август куни Ўзбекистон Мудофаа вазирлиги бўлинмаси машғулот ўтказиладиган жойга колоннада юришни амалга оширган. Қўшни давлат ҳудудида колоннада юришларга Ўзбекистон ҳаво кучларининг Ми-35 жанговар вертолётлари ҳамроҳлик қилган.
Россия ҳарбий контингентининг асосини 201-ҳарбий базанинг бўлинмалари, хусусан, тоғ моторли милтиғи, танк, артиллерия бўлинмалари, шунингдек, Марказий ҳарбий округнинг радиоэлектрон ҳужум ва радиация, кимёвий ва биологик ҳимоя бўлинмаларининг мутахассислари ва махсус мақсадли бўлинмалар ташкил этади.
Машғулотларнинг очилиш маросими Тожикистоннинг Хатлон вилоятидаги Ҳарб майдон полигонида бўлиб ўтди.
Қўшма машғулотлар Афғонистондаги вазиятнинг кескинлашуви фонида ўтказилмоқда. Афғонистондан АҚШ қўшинларининг катта қисми олиб кетилгач, мамлакатда «Толибон» жангариларининг ҳужумлари бошланди. Айни пайтда «Толибон» Афғонистон чегараларининг, тахминан, 90 фоизини назорат қилмоқда ва йирик шаҳарларга ҳужум уюштирмоқда.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.
Изоҳ (0)