Фарғона вилояти Сўх тумани «Ҳушёр» сел ўзанига 4 август куни куннинг иккинчи ярмида қўшни Қирғизистондан сел келди.
Гидрометеорологик илмий таҳлиллар, об-ҳаво прогнозлари, тадқиқотлар, маърузалар каналининг ёзишича, сел тумандаги ички йўлни бир-бири билан боғлайдиган кўприкни зарарлаган. Аҳоли яшаш ҳудудларига зарар келтирмаган.
«Ҳушёр» аҳоли яшаш ҳудудларига яқин «Ўзгидромет»нинг «Сариканда» метеорологик станциясида қисқа вақт оралиғида умумий 14,5 миллиметр миқдорда жала ёғган.
«Ўзгидромет» 3—5 август кунлари Республиканинг тоғ ва тоғ олди ҳудудларида сел келиш хавфини эълон қилганди. ФВВ аҳолини эҳтиёт чораларини кўришга чақириб, нохуш вазиятлар вужудга келганда вазирликнинг 1050 қисқа рақамига мурожаат этишни сўради.
Республиканинг тоғ олди ва тоғли ҳудудларида сел келиши хавфи 6—8 август кунлари ҳам сақланиб қолади.
Эслатиб ўтамиз, Фарғона вилоятининг Сўх туманида июлда уч марта сел кузатилди, 20 та хонадон зарар кўрди. Жабрланган оилаларга ёрдам пуллари тарқатилди.
13 июль куни Қирғизистон ҳудудида кучли ёмғир ёғиши оқибатида Наманган вилоятининг Косонсой туманига сел келганди. Ҳодиса оқибатида 6 киши тан жароҳати олди, 9 киши ҳалок бўлди. Уларнинг энг каттаси 48, энг кичиги эса 6 ёш бўлган. Селдан жабрланиб, касалхоналарга жами 24 киши мурожаат қилган.
Наманган вилояти Поп тумани тоғли «Имомота» МФЙ ҳудудларидаги сойда эса 20 июль кечаси кучли сел бир қанча автоуловларни оқизиб кетди. Сел оқибатида жабрланган ёки ҳалок бўлганлар йўқ. Шу куни ёғган кучли жала оқибатида Наманган шаҳрининг Давлатобод туманидаги айрим хонадонлар ҳам жиддий зарар кўрди.
Мавзуга доир: Наманганда сел оқибатида иккита кўприк шикастланди
Изоҳ (0)